Т.Сүхболд: Сэтгэлзүйн байдлыг харгалзан цагдан хорьсон

Баянзүрх дүүргийн 26 дугаар хорооны нутаг дэвсгэрт 2024 оны 01 дүгээр сарын 24-ний шөнө 01 цагийн үед газ тээвэрлэн явсан тээврийн хэрэгсэл шатаж дэлбэрсэн гэх хэрэгт Эрүүгийн хэрэг хянан шийдвэрлэх тухай хуулийн 31.4 болон 31.5 дугаар зүйлийн 1 дэх хэсгийн 1.2-т заасан хойшлуулшгүй тохиолдол, өөрийн болон бусдын амь нас, эрүүл мэндэд хохирол учруулж болзошгүй үндэслэлээр тус хэргийн сэжигтэн Р, М нарыг тус тус 48 цагийн хугацаатай түр баривчилаад байна.  Хэргийн газрын үзлэг, шинжилгээний талаар Цагдаагийн Ерөнхий газрын дарга Т.Сүхболдоос тодруулахад "Хэргийн газрын үзлэг дуусч нийт 12 шинжээч өнөөдрөөс томилогдож байгаа. Шинжилгээний хариу эхнийх нь 12 хоногт, хамгийн урт хугацаа шаардаж байгаа нь хоёр сарын дараа гарна. Хэний буруутай үйлдэл вэ гэдэг нь мэргэшсэн шинжээчийн дүгнэлтээр тодорхой болж шүүхээр эцэслэгдэнэ. Одоогоор бид оршин, суугч иргэдээс байцаалт аваад явж байна. Хуулийн дагуу хоёр жолоочийг түр хугацаагаар барьсан байгаа. Патрол маркийн автомашины жолооч хэргийн газраас зугтсан гэдэг мэдээлэл худал. Энэ гэмт хэрэг болгоомжгүй үйлдэгдсэн гэмт хэрэг. Тиймээс сэжигтний сэтгэл зүйн байдлыг мөн харгалзан үзэж цагдан хориод байгаа. Патрол автомашин албаны автомашин байсан нь үнэн. Буруутай этгээдээс хохирлыг барагдуулах хуультай" гэв.