Боловсрол, шинжлэх ухааны яамны харьяа “Инженер, технологийн дээд боловсрол” төсөл АПУ ХК-тай хамтран “1000-инженер” төслийн Коосэн болон Бакалаврын хамтарсан хөтөлбөрийн төгсөгчдийг ажлын байранд зуучлах асуудлаар гэрээ байгуулж хамтарч ажиллахаар боллоо.
Коосэн хөтөлбөрийн анхны төгсөгчид одоогоор тус компанид ажиллаж, мэргэшсэн өндөр чадвартай болохоо харуулаад байгаа юм. Тиймээс компанийн зүгээс цаашид ч төгсөгчдийг ажлын байраар хангахад нээлттэй байгаа гэдгээ илэрхийлээд байна. Төслийн хүрээнд инженер технологийн мэргэжил эзэмшсэн төгсөгчдөд компанийн үүд хаалга хэзээд нээлттэй болохыг гэрээ байгуулах үеэр онцолж байсан юм.
“Инженер, технологийн дээд боловсрол” төслийн хувьд 2020 оны 04 дүгээр сард Коосэн хөтөлбөрийн 24, хос дипломтой төгсдөг Бакалаврын хамтарсан хөтөлбөрийн 44 оюутан сургуулиа амжилттай төгсөж өдгөө эх орондоо ирээд байна. Төслийн зүгээс төгсөгчдөө ажлын байранд зуучлах зорилгоор 2019 онд “1000 инженер-ажлын байр” өдөрлөгийг амжилттай зохион байгуулж өнгөрсөн оны төгсөгчид 100 хувь ажлын байраар хангагдаад байгаа юм. 2020 оны төгсөгчдөө ажлын байранд зуучлах зорилгоор “1000 ИНЖЕНЕР-АЖЛЫН БАЙР-II” нээлттэй өдөрлөгийг 2 дахь жилдээ ирэх 10 дугаар сард зохион байгуулахаар төлөвлөн бэлтгэж байгаа юм байна.
Эх сурвалж: БШУЯ
