Иргэдийн зүгээс мэдээллийг сайтар нягталдаггүй, хайнга хандаж цахим орчинд худалдан авалт хийж байгаа нь гэмт хэрэгтнүүдэд өгөөш болж байгааг цагдаагийн байгууллагаас анхааруулж байна. Өнгөрсөн 2022 оны эхний арван сарын байдлаар залилах төрлийн 10,300 гэмт хэрэг бүртгэгдсэнээс 8,056 нь цахим орчинд үйлдэгджээ. Цахимаар үйлдэгдэж байгаа залилангийн хоёр төрөл байна.
Нэгдүгээрт, урьдчилгаа төлбөр авах байдлаар бусдыг залилдаг,
Хоёрдугаарт, бусдын цахим хаягт нэвтэрч танилуудаас нь мөнгө зээлэх байдлаар гэмт хэрэг үйлддэг.
Сүүлийн үед урьдчилгаа төлбөр авах байдлаар иргэдийг залилах тохиолдол нэмэгдсэн бөгөөд залилагч нь зах зээлийн ханшнаас бага зэрэг доогуур үнэ санал болгож иргэдийн анхаарлыг татдаг . Иргэд холбогдоход урьдчилгаа төлбөрөө байршуулж захиалгаа баталгаажуул гэх байдлаар бусдыг төөрөгдөлд оруулж залилдаг байна. Яг одоо урьдчилгаа төлбөрөө шилжүүлж захиалгаа баталгаажуулахгүй бол таны захиалга хүчингүй болно гэх зэргээр ятгаж иргэдийг хохироодог байна.
Залилагчид өөрийн хувийн дансаа гэмт үйлдэлдээ ашигладаггүй. Бусдын данс болон утасны дугаарыг ашигладаг. Таксины жолооч ч юм уу, өөр хэн нэгний данс руу мөнгө оруулж гэмт үйлдлээ нуун дарагдуулах нь бий.
