Хууль зүйн сайд О.Алтангэрэл угаартаж нас барсан 6 хүний хэргийн материал задарсантай холбоотой цаг үеийн асуудлаар мэдээлэл хийлээ.
Тэрбээр “2025 оны нэгдүгээр сарын 23-ны өдөр эрдэнэт хүний амь нас хохирсон явдалд эмгэнэл илэрхийлье. Энэ асуудлын эргэн тойронд болж байгаа явдлын талаар Хууль зүйн сайдын хувиар мэдээлэл өгч байна. Энэ хэргийн хохирогч Хууль зүйн яамны харьяа Хилийн цэргийн ангийн алба хаагч О.Одбаяр албаа үлгэр жишээ хааж байгаа байлдагч юм. Энэ хэрэгт цагдаа, АТГ-аас шалгалт явуулж байгаа. Тавантолгой түлш компанийн үе үеийн удирдлагуудыг шалгаж байгаа. Энэ хүрээнд 29 төрлийн химийн бодист мэргэжлийн байгууллагаар шинжилгээ хийлгүүлж байна. Албан тушаалтнууд болон түлшний барьцалдуулагчтай холбоотой асуудал гарвал хариуцлага тооцох болно.
Хоёрдугаарт, хохирогчийн эмзэг мэдээллийг агуулсан, цагдаагийн рапорт мэт харагдах мэдээлэл өчигдрийн 21:00 цагийн орчим дэлгэгдсэн. Энэ бол Эрүүгийн хуулиар хариуцлага хүлээлгэх гэмт хэрэг юм. Хүнд нөхцөл, зовлон бэрхшээлийг туулж байгаа хүмүүст хүндээр тусах мэдээллийг албаны журмаар олж аваад олон нийтэд цацаж байгаа нь гэмт хэрэг. Тухайн мэдээлэлд дурдагдсан зарим зүйл цагдаагийн байгууллагад огт байхгүй. Тиймээс зориудаар тараасан гэж харж байгаа. Цагдаагийн байгууллага энэ хэргийг илрүүлэхийн төлөө ажиллаж байна. Мэдээлэл хийсэн байлдагчийг хууль сахиулах байгууллын алба хаагчид хамгаална. Тэр хүний эрхэд халдсан ямарваа нэг үйл ажиллагаа явуулж болохгүй гэдэг байр суурьтай байгаа.
Ил болсон мэдээллийг цагдаагийн мөрдөгч бичсэн гэж харагдаад байгаа. Цагдаагийн
байгууллагын оролцоо байна гэж харж байна?
Тэр мэдээлэлд дурдагдсан гэмт хэргийн бүртгэл цагдаагийн байгууллагад байдаг. Харин бусад
зөвлөгөө заавар өгсөн гэх мэдээлэл цагдаад байхгүй. Тиймээс тэр мэдээллийг цацсан этгээдийг
олж тогтооно. Хэрэв цагдаагийн алба хаагч задруулсан бол ЦЕГ-ын удирдлагад хариуцлага
тооцно" гэв.
