УИХ-ын гишүүн, Боловсролын сайд П.Наранбаяр, УИХ-ын гишүүн Б.Найдалаа нар өчигдөр Төрийн ордонд маргалдаж, П.Наранбаярын биед халдсан асуудал ЦЕГ-т бүртгэгдэж, хохирлын хэмжээг тодруулахаар ажиллаж байгаа талаар тус газраас мэдэгдсэн. Тэгвэл энэ асуудлаар Боловсролын сайд П.Наранбаяр байр суурь илэрхийллээ. Тэрбээр, "Би Цагдаагийн байгууллагад дуудлага өгөөгүй. Харин эмнэлэгт очиж хоёр жижиг оёдол тавиулсан. Миний биед халдсан асуудлууд гарч байна. Гэхдээ тэрэнд бодсон зүйл алга. Санамсаргүй юм болсон. Гэхдээ харилцан зодоон болоогүй. Зодоон гэдэг чинь хоёр талаасаа зодолдоно, энэ чинь жинхэнэ балмад үйлдэл. Хүн хэлээрээ, мал хөлөөрөө. Аливаа зүйлийг ярилцаж л шийддэг. Нийгэмд янз бүрийн ойлголт байна. Дарамт шахалтыг юу гэж ойлгохоос шалтгаална. Ер нь дарамт шахалтыг даахгүй бол яах гэж энэ сайдыг хийж байгаа юм бэ. Бие биетэйгээ ойлголцох, харилцан ярилцаж зөв шийдлээ олох нь Ардчилсан нийгмийн энгийн л асуудал, онцлог нь. Боловсролын салбар хүн бүрийн анхаарлын төвд байдаг. Бид боловсролын салбарт хүчтэй шинэчлэл хийхээр зорьж байна. Хамгийн түрүүнд хүртээмжийг нэмэх асуудлыг ярьж байна. 2023 он гэхэд 88 мянган хүүхэд нэмэгдэх учраас эдгээр хүүхдийг гурван ээлжээр биш, хоёр ээлжээр хичээллэдэг болох, цаашлаад ирээдүйд нэг ээлж рүү оруулж хүүхдийн хүмүүжил, хичээл зэрэгцэж явдаг хэлбэр рүү орох ёстой. Гэтэл өнөөдөр хичээлийг нь заагаад тараагаад дараагийн ээлж орж байна. Хүн болгож төлөвшүүлэх шаардлага бий. Г.Дамдинням гишүүний ярьж байгаа зүйл үндэслэлгүй гэж би хэлнэ. Тэр хүн боловсролын салбарыг гэсэн сэтгэлтэй учраас над руу бус салбарт санаа зовж л янз бүрийн юм ярьж байгаа байх" гэлээ.
