Хөвсгөл аймгийн Эрдэнэбулган сумын фэйсбүүк хуудаст коронавирусын халдвар авсан иргэдийн нэрсийг олон нийтэд мэдээллэсэн, Түнэл суманд коронавирусын халдвар авсан иргэдийн байршлыг олон нийтэд зарлаж, ойр орчимд зорчихгүй байхыг анхааруулж, хүний нэр төрд халдаж ялгаварлан гадуурхсан явдал өнгөрсөн 7 дугаар сард болжээ. Энэ талаар Хүний эрхийн Үндэсний Комисст гомдол ирж, гомдлын дагуу шалгах ажиллагаа явуулж дээрх нөхцөл байдлыг тогтоосон байна. Тиймээс тогтоогдсон нөхцөл байдлыг арилгаж, хүний нэр төрд халдсан албан тушаалтнуудад хариуцлага тооцож ажиллах талаар ХЭҮК-ын гишүүн Б.Энхболд шаардлага явуулсан бөгөөд энэ дагуу Хөвсгөл аймгийн засаг дарга Ш.Идэрбаясгалан Эрдэнэбулган, Түнэл сумын холбогдох албан тушаалтнуудад арга хэмжээ авч, сахилгын шийтгэл оногдуулжээ.
Цаашид ч иймэрхүү байдлаар хүний нэр төрд халдах үйлдэл гарах эрсдэлтэй байна. Өнгөрсөн хугацаанд иргэд гэрийн тусгаарлалтад орж, хаалганд наалт нааснаар хүнсээ авах боломжгүй болсон, мөн тусгаарлах байрны ойр орчимд зорчихгүй байх тухай анхааруулга, мэдээллийг олон нийтэд түгээж хүний нэр төрийг гутаан доромжилсон, ялгаварлан гадуурхсан зэрэг гомдол, мэдээлэл ХЭҮК-т байнга ирж байгаа талаар мэдээллээд байсан юм. Тиймээс хүний эрх, эрх чөлөөг хүндэтгэж ажиллах талаар Комиссын гишүүний зөвлөмжийг 21 аймгийн удирдлагуудад хүргүүлсэн гэлээ.
