Монгол Улсын Шадар сайд С.Амарсайхан өчигдөр шөнө ЭМЯ-нд ажиллаж, Улсын онцгой комиссоос өгсөн үүрэг даалгаврын биелэлтийг шалгаж зарим асуудлаар хэлэлцсэн. /2020.03.17-ны 22:30 цаг/
Тэрбээр, "ХӨСҮТ-д ноцтой асуудал байна. ХӨСҮТ-ийн ажилтан танил талаа ашиглан нэг гэр бүлийн нөхрийх нь өмнөөс эхнэрээс нь шинжилгээ авсан байна. Нөхөр нь шинжилгээ өгөлгүй хөдөө орон нутгаар яваад халдвар тараасан. Эхнэр нь нөхрийнхөө өмнөөс 2, 3 удаа шинжилгээ өгөхөд эерэг гараад байдаг. Ойрын хавьтлаа хөөж байна гэсээр байтал жинхэнэ ойрын хавьтал, батлагдсан тохиолдол чинь сөрөг буюу хуурамч хариутай гадуур яваад энд тэнд халдвар тархаад байгаа эрсдэлүүд нэмэгдээд байна. Энэ бол ХӨСҮТ-ийн маш олон ноцтой асуудлуудын нэг. Ийм ноцтой асуудал байгаа учраас тандалт судалгааны ажил үр дүнгүй болоод байна. Хариуцлагатай байх ёстой ажилчид нь өөрсдөө хариуцлагагүй үйлдэл гаргаад байгаа учраас тархалтын эрсдэл буурахгүй байгаад байна" гэв.
