ХЭҮК-ын гишүүн Б.Энхболд хууль сахиулах ажиллагаанд хүний эрхийг дээдэлж ажиллахыг зөвлөлөө

Цагдаа, дотоодын цэргийн байгууллагын удирдах ажилтны зөвлөгөөн “Асуудлаас шийдэлд” уриатайгаар бүсчилсэн хэлбэрээр 2024 оны 01 дүгээр сарын 17-ноос 19-ний өдрүүдэд болж байна. Төв, орон нутгийн 400 гаруй удирдах ажилтнууд 2024 оны зорилго, зорилтоо тодорхойлж буй зөвлөлдөх уулзалтад Хүний эрхийн Үндэсний Комиссын гишүүн Б.Энхболд оролцож, мэдээлэл хийлээ. Энэ үеэр тэрээр "Цагдаагийн байгууллага нь хүний эрхийг хамгаалах тогтолцооны үндсэн байгууллага" гэдгийг онцлон тэмдэглээд Хүний эрх, эрх чөлөөг хамгаалах, гэмт хэргээс урьдчилан сэргийлэх, иргэдийн зөрчигдсөн эрхийг сэргээх чиглэлээр хэрэгжүүлсэн арга хэмжээ, түүний үр дүнг олон үзүүлэлтээр харж болохоор байгааг дурдсан юм.