Улаанбаатар хотын гэр хорооллын иргэдийн амьдрах орчин нөхцөлийг сайжруулах, эрүүл, аюулгүй орчинг бүрдүүлэх, агаар хөрсний бохирдлыг бууруулах зорилгоор гэр хорооллыг орон сууцжуулах бодлогыг боловсруулж, гэр хорооллын газрыг дахин төлөвлөн барилгажуулах төслийг хэрэгжүүлж ирсэн.
Энэхүү төслийн хүрээнд өнөөдөр нийслэлийн Сүхбаатар дүүргийн 9, 10, 11-р хорооны нутаг дэвсгэрт орон сууцны VII хороолол орчмын “Б” хэсэгчилсэн талбайн долоон га талбайд гэр хорооллын дахин төлөвлөлтийн төсөл хэрэгжүүлж буй “Пример инвестмент групп” ХХК нь 108 айлын орон сууцыг ашиглалтад оруулж, нээлтээ хийлээ.
Тус компани нь 2015 онд нийт 65 нэгж талбарын газрыг чөлөөлөн 2017 онд 60 айлын нэг блок орон сууц, 2018 онд 60 айлын нэг блок, нийт 120 айлын орон сууцны барилга угсралтыг гүйцэтгэж, ашиглалтад оруулсан бөгөөд өнөөдөр нэг блок 108 айлын орон сууцыг байнгын ашиглалтад оруулан, газар чөлөөлсөн иргэдэд түлхүүр гардуулан өглөө.
