Засгийн газрын өнөөдрийн хуралдаанаар орон нутагт их, дээд сургуулиудыг сургалт, эрдэм шинжилгээ, үйлдвэрлэлийн цогцолбор болгон хөгжүүлэх тогтоол гарлаа.
Энэ тухай БШУ-ы сайд Л.Энх-Амгалан танилцуулахдаа их, дээд сургуулиудыг орон нутагт хөгжүүлэх нь нийслэлд үүсээд буй түгжрэлийг бууруулахаас гадна хөдөө орон нутгийн боловсон хүчнийг чадавхжуулах, цаашид бүс нутгийн хөгжилд хувь нэмэр оруулах цогц асуудал гэдгийг онцоллоо.
Монгол Улсад өнөөдрийн байдлаар 88 их, дээд сургуульд 150 мянган оюутан суралцаж байна. Үүнээс нийт оюутны 92 хувь буюу 143 мянга нь Улаанбаатар хотод, 7000 нь хөдөө орон нутгийн 8 их, дээд сургуульд суралцаж байна.
Түүнчлэн, Эрдэнэт, Дархан, Өмнөговь аймагт сургалт судалгаа, үйлдвэрлэлийн цогцолбор болгож МУИС, ШУТИС, ХААИС-ийн сургуулиудыг байгуулах шийдвэр гарч байна. Ингэхдээ салбар биш сургуулиудыг байгуулна. Гэхдээ шинээр барилга барихгүй, тухайн аймгуудад байгаа барилга байгууламж, байрыг ашиглаж өргөтгөл хийх замаар сургалт судалгааны цогцолбор байгуулах юм. Ингэснээр 10-15 мянган оюутан орон нутагт суралцах боломжтой болно гэлээ.
Хөдөө орон нутагт суралцаж буй оюутнуудад Боловсролын зээлийн сангаас хөнгөлөлттэй тэтгэлэг олгоно. Мөн багш нарт хөдөө орон нутагт ажилласны нэмэгдэл олгохоор боллоо. Ирэх оноос багш нарт хөдөө орон нутагт ажиллахад урамшуулал олгох, Улаанбаатар хотод ажилласантай дүйх хэмжээний цалин олгох, ипотекийн зээлд хамруулах, бизнес эрхлэх боломж олгох гээд багцаар нь санал болгохоор шийдвэрлэсэн байна.
