Нийтийн тээврийн дахин төлөвлөлттэй холбоотойгоор НЗДТГ-аас мэдээлэл өглөө.
Нийслэлийн Засаг даргын хэвлэлийн төлөөлөгч Н.Сугар: Чиглэлийг 100 хувь шэнэчилсэн зохицуулалт амралтын өдрүүдэд хэрэгжиж эхэлсэн ч иргэдээс ирсэн санал гомдлын дагуу тодорхой чиглэлүүдийг эргэн сэргээх арга хэмжээ авч эхэлсэн. 100 хувь шинэчлэл хийсэн нь олон нийтийн хэрэгцээ шаардлагад нийцэхгүй байгаа учир 65 хувийн шинэчлэлийг авч үлдэн, 35 хувийг нь иргэдээс ирсэн саналын дагуу хуучин хэвээр нь үлдээсэн гэлээ.
Тодруулбал, үндсэн 6 чиглэл, хот орчмын 15 чиглэл, дунд оврын 5 чиглэлийг тус тус шинэчилсэн хэвээр үлдээсэн. Өнгөрсөн хоёр өдрийн хугацаанд хийсэн судалгаагаар, эдгээр шинэ чиглэлүүд иргэдэд хүрэх хүртээмж нь сайн, үр дүнгээ өгч байна гэсэн дүн гарсан учраас 65 хувийн шинэчлэлийг үлдээсэн гэж тайлбарлав.
Харин иргэдээс хамгийн их санал гомдол ирсэн 71 чиглэлийг эргэн сэргээж маршрутын мэдээллийг өгөөд байгаа юм. Imap апп дээр мэдээллийн өөрчлөлтийг оруулахаар инженер техникийн мэргэжилтнүүд ажиллаж байна.
Нийтийн тээврийн шинэчлэлийг яагаад ингэж хийх болсон шалтгааныг тайлбарлахдаа, Нэг буудал дээр 28 чиглэлийн автобус давхцдаг байсан давхцлыг арилгах зорилгоор өөрчлөлт хийсэн. Иргэд хамгийн их зорчдог чиглэлийг авахын тулд нийтийн тээврийн салбарын бизнес эрхлэгчдийн дунд өрсөлдөөн, ашиг сонирхлын зөрчил үүсдэг байсан тогтолцооноос салах үндэслэлээр чиглэлийн шинэчлэлийг хийж буй аж. Нийтийн тээврийн цогц шинэчлэлийн бас нэг ажил нь парк шинэчлэл гэдгийг дуулгасан.
