Энэ сарын 2-нд цахим сүлжээнд “Тавантолгой төмөр зам” ХХК-ийн ажилтнуудын ажлын байрандаа архидан согтуурч буй бичлэг цацагдсан. Уг бичлэгт "Тавантолгой төмөр зам" ХХК-ийн Санхүү төлөвлөлтийн газрын дарга Ж.Баатарсүрэн, нягтлан бодогч Ж.Нэмэхбаяр, сургалтын мэргэжилтэн Ц.Болорсувд, Захиргаа удирдлагын газрын дарга М.Гансэлэм, хэлтсийн дарга Ц.Цогтжаргал нар согтуурч, зүй бус үйлдэл гаргаж байгаа нь бичигдсэн юм.
Үүнтэй холбогдуулан тус компаниас мэдэгдэл гаргаж ажлын байранд тавигдах шаардлагыг зөрчсөн холбогдох ажилтнуудыг 2024 оны хоёрдугаар сарын 20-ны өдөр үүрэгт ажлаас нь чөлөөлж, хөдөлмөрийн харилцааг дуусгавар болгосон талаар мэдэгдэж байсан юм.
Тэгвэл цагдаагийн байгууллагаас цахим орчинд тархсан бичлэгтэй холбогдуулж Сүхбаатар дүүргийн цагдаагийн газрын нэгдүгээр хэлтсээс зөрчил шалган шийдвэрлэх ажиллагааг явуулж “Согтууруулах ундаа хэрэглэхийг хориглосон газарт архидан согтуурсан” үйлдэлд Зөрчлийн тухай хуулийн 5.1 дүгээр зүйлийн 2 дах хэсэгт зааснаар холбогдогч нарт 25 нэгж буюу 25.000 төгрөгөөр торгожээ.
Эх сурвалж: ЦЕГ
