Сүрьеэгийн эмийг эмчийн зааврын дагуу уухгүй, тасалдуулвал эмэнд тэсвэртэй сүрьеэ үүсэх эрсдэлтэй

Дэлхий нийтээр жил бүрийн гуравдугаар сарын 24-нийг сүрьеэ өвчинтэй тэмцэх өдөр болгон тодорхой уриан дор тэмдэглэдэг. Дэлхийн эрүүл мэндийн байгууллагаас 2024 онд “ТИЙМЭЭ-БИД СҮРЬЕЭГ УСТГАЖ ЧАДНА” хэмээн дэлхий нийтээр сүрьеэ өвчнийг устгах амлалтаа биелүүлэхийг анхааруулж шинэ санаа, санаачлагатай ажиллахыг шаардаж байгаа билээ. ХӨСҮТ-ийн СТСА-ны үзлэгийн эмч, Клиникийн профессор П.Энхтамир: Монгол Улсын хэмжээнд жилд 3000-4000 орчим сүрьеэгийн шинэ тохиолдол бүртгэгддэг. 2013 оны судалгаагаар, нийт сүрьеэгээр өвчлөгчдийн 70 гаруй хувь нь 18-45 насныхан гэж гарсан байдаг. Сүрьеэ өвчин хүнээс хүнд зөвхөн амьсгалын замаар дамждаг. Удамшдаггүй. Энгийн халдварт өвчин. Тиймээс аяга халбага, суултуур гэх мэт ахуйн замаар халддаг нь нотлогдоогүй. Халдвартай хэлбэрийн сүрьеэгийн үед, Удаан хугацаагаар ханиалгах, цэр гарах, цээжээр өвдөх, хөлрөх, амьсгаадах, халуурах, богино хугацаанд жин хаях зэрэг шинж тэмдгүүд илэрч болно. Хувь хүний онцлогоос хамаарч эдгээр шинж тэмдгүүд ганц нэгээрээ ч илрэх боломжтой. Сүрьеэ өвчин эдгэрдэг. Гэхдээ эрт оношлогдох тусмаа эмчилгээний үр дүн маш сайн байдаг. Эмийг эмчийн зааврын дагуу 4-6 сарын турш өдөр бүр уух ба эмийг дур мэдэн тасалдуулвал эмэнд тэсвэртэй  сүрьеэ үүсэх хүндрэх эрсдэлтэйг анхааруулж байна. Монгол улсад сүрьеэ өвчний оношилгоо эмчилгээ үнэ төлбөргүй байдаг бөгөөд дээр дурдсан эрсдэлт шинж тэмдэг илэрсэн тохиолдолд аймаг, дүүргийн сүрьеэгийн диспансер болон харьяа эрүүл мэндийн байгууллагатаа хандаж оношлуулаарай. 2018-2023 онд нийт 6956 халдвартай сүрьеэтэй өвчтөнийг амжилттай эмчилж эдгэрүүлсэн нь 100.000 гаруй хүнийг сүрьеэгийн халдвар авахаас сэргийлж, 10.000 орчим хүнийг сүрьеэ өвчнөөр өвчилхөөс хамгаалсан байна.