ЭМД-ын сангийн орлого өмнөх оны мөн үеэс 47.6 тэрбум төгрөгөөр нэмэгджээ

Эрүүл мэндийн даатгалын ерөнхий газрын мэдээгээр эрүүл мэндийн даатгалын сангийн орлого 2024 оны эхний улиралд 434.6 тэрбум төгрөг болж, өмнөх оны мөн үеэс 47.6 (12.3%) тэрбум төгрөгөөр нэмэгдсэн байна. Эрүүл мэндийн даатгалын сангийн зарлага 2024 оны эхний улиралд 511.7 тэрбум төгрөг болж, өмнөх оны мөн үеэс 116.0 (29.3%) тэрбум төгрөгөөр өссөн байна. ЭМД-ын сангийн орлого нэмэгдэхэд эрүүл мэндийн даатгалын сангийн шимтгэлийн орлого өмнөх оноос 14.4 (10.5%), төр даатгалыг хариуцах иргэдэд улсын төсвөөс төлсөн шимтгэл 24.3 (42.8%), төр төлбөрийг нь хариуцах эрүүл мэндийн тусламж, үйлчилгээний зардлыг эрүүл мэндийн даатгалын байгууллагаар дамжуулан санхүүжүүлэхэд улсын төсвөөс олгох хөрөнгө 7.9 (4.1) тэрбум төгрөгөөр тус тус өссөн нь нөлөөлжээ. Улсын хэмжээнд 2024 оны эхний улиралд эрүүл мэндийн даатгалд давхардаагүй тоогоор 3018.4 мянган хүн даатгуулсан байна. Нийт даатгуулагчийн 2239.2 (74.2%) нь шимтгэлийг улсын төсвөөс хариуцсан иргэд, 667.9 (22.1%) ажил олгогч, даатгуулагч хариуцан төлсөн иргэд, 111.3 (3.7%) шимтгэлийг өөрөө хариуцан төлсөн иргэд байна.