ХЭҮК:Архаг хууч өвчинтэй иргэдийн эрүүл мэндийн үйлчилгээ авах боломж хязгаарлагдмал байна

Хүний эрхийн Үндэсний Комиссын ажлын хэсэг “Хүний эрхийн төлөө хамтдаа” нээлттэй өдрийн хүрээнд Завхан аймгийн Тосонцэнгэл суманд ажиллаж, нэгдсэн эмнэлгийн үйл ажиллагаатай танилцжээ. 

Эрүүл мэндийн даатгалын тусламж үйлчилгээг оношийн бүлгээр нь архаг, төлөвлөгөөт, цочмог гэж ангилдаг бөгөөд архаг хууч өвчний тусламж үйлчилгээ үзүүлэх үйлчилгээний санхүүжилт хязгаартай, “тохиолдолд суурилсан төлбөр”-ийн аргаар үйлчилдэг байна. Үүнээс шалтгаалж архаг хууч өвчинтэй иргэдэд шаардлагатай үйлчилгээ үзүүлэхэд сарын квот дуусдаг тул эмнэлгийн зүгээс зөвхөн эмийн жор бичиж өгөхөөс өөр боломжгүй болдог байна. Энэ байдал нь иргэдийн эрүүл мэндийн тусламж үйлчилгээ авах эрхийг хязгаарлаж байгаа бөгөөд төсөв, санхүүжилтийн хүрэлцээтэй шууд холбоотойг эмч, ажилтнууд онцоллоо. 

Комиссын гишүүн Б.Энхболд эмнэлгийн үйл ажиллагаатай танилцах үеэр тулгамдаж буй асуудлуудад онцгой анхаарч, тэдгээрийг шийдвэрлэх нь хүний эрхийн баталгааг хангах, хүний эрхэд суурилсан эрүүл мэндийн үйлчилгээ үзүүлэхэд чухал ач холбогдолтойг тэмдэглэлээ. Тухайлбал,

•1994 онд ашиглалтад орсон барилгад их засвар хийх, инженерийн шугам сүлжээг сайжруулж, дотоод засварын үйл ажиллагаанд анхаарах •Шинээр барьж буй эмнэлгийн өргөтгөлийн барилгын ажлын явц удаашралтай байгаад анхаарал хандуулж, явцын хяналтыг сайжруулах •Хөгжлийн бэрхшээлтэй иргэдийн эрүүл мэндийн үйлчилгээний хүртээмжийг сайжруулж, орчны болон үйлчилгээний хүртээмжийг бодитоор нэмэгдүүлж, тулгамдаж буй саад бэрхшээлийг арилгах арга хэмжээг авах •Нэгдсэн эмнэлгийн ажилтнуудын хүний эрхийн мэдлэг, ойлголтыг нэмэгдүүлэх, ажлын байрны соёл, харилцаа, хандлагыг сайжруулах чиглэлээр сургалт, соён гэгээрүүлэх ажлыг шат дараатай зохион байгуулах талаар зөвлөсөн юм.

Тосонцэнгэл сумын нэгдсэн эмнэлэг нь 1938 онд байгуулагдсан бөгөөд 1994 онд ашиглалтад орсон барилга байгууламжид, 102 ортой, 100 гаруй эмч, эрүүл мэндийн ажилтантай үйл ажиллагаа явуулж байна. Сумынхаа 10 мянга орчим иргэн, тойргийн хүрээнд Их-Уул, Тэлмэн сумаас гадна Завхан аймгийн хойд бүсийн бусад сум, Архангай, Хөвсгөл аймгийн сумдын нийт 20 гаруй мянган хүн амд эрүүл мэндийн тусламж үйлчилгээг үзүүлдэг байна.