ХОВД АЙМАГ: 350 хүүхдийн шүдний цоорлыг эмчилж, фторт түрхлэг хийлээ

Манай улсад шүд цоорлын хэмжээ 90 хувьтай байгаа нь дэлхийн дунджаас хоёр дахин өндөр үзүүлэлт юм. Тэр дундаа хөдөө орон нутагт шүдний өвчлөл өндөр байгааг мэргэжилтнүүд хэлж байна. Тиймээс эмч мэргэжилтнүүд сайн дураар нэгдэн хөдөө орон нутагт амьдарч буй хүүхдүүдэд шүдний эмчилгээ үйлчилгээг үзүүлэх арга хэмжээг зохион байгуулдаг. Учир нь алслагдсан сумдад шүдний эмч байдаггүйгээс эмчилгээ үйлчилгээ авах боломж хязгаарлагдмал байдаг байна.

Энэ удаад НҮБ-ын Хүүхдийн сантай хамтарсан АШУҮИС-ийн Анагаах ухааны сургууль, Нүүр ам судлалын сургуулийн захирал АУ-ны доктор Б.Батбаяр тэргүүтэй 7 багш, эмч нарын баг Ховд аймгийн Дарви суманд гурван өдрийн турш үзлэг эмчилгээ хийж ажиллажээ.  Ингэхдээ 18 хүртэлх насны хүүхдийн шүдний урьдчилан сэргийлэх үзлэг, эмчилгээ үзлэгийг нийт 350 хүүхдэд үзүүлж, 4600 шүдэнд фторт түрхлэг, 335 шүдэнд сийлант, 433 шүдэнд сафоройд түрхлэг, 249 шүдний цоорлыг эмчилж ломбо тавих зэрэг үйлчилгээ үзүүлжээ. Мөн яаралтай түргэн тусламжаар ирсэн хоёр хүүхдэд нүүр амны мэс заслын эмчилгээ хийсэн байна.  

 Мөн хүүхдүүд эцэг эхчүүдэд амны хөндийн эрүүл мэнд, шүд угаах талаарх мэдлэг, дадлыг тодорхойлж, шүд цоорох өвчний эрсдэлт хүчин зүйлсийг илрүүлэх судалгаа хийжээ. Үзлэг эмчилгээнд хамрагдсан нийт хүүхэд, асран хамгаалагч нарт шүд угаалт, оо сойзны сонголт түүний хэрэглээ зэрэг амны хөндийн эрүүл мэндийн сургалт зөвлөгөө өгсөн байна. Цаашид шаардлагатай мэдээлэл үйлчилгээг орон нутагт хүргэж ажиллах шаардлагатайг багийнхан хэлж байна. Сайн дурын багийнхан ирэх сард Сүхбаатар аймагт ажиллах юм.