ХААИС-ийн агроэкологийн сургуулийн оюутнууд ХБНГУ-д цалинтай дадлагажина

ХААИС-ийн Агроэкологийн сургууль ХБНГУ-ын “JD EAST” дадлага зуучлалын байгууллагатай 2016 оноос хойш хамтран ажиллаж 50 гаруй бакалавр, магистр, докторын оюутнуудыг ХБНГУ-ын газар тариалангийн аж ахуй нэгжүүдэд амжилттай дадлагажуулсан байна. Тус байгууллага нь жилдээ 10 орноос 1000-1500 оюутныг 3-6 сараар ХБНГУ-ын ХАА-н чиглэлийн 200 гаруй аж ахуйд дадлагат зуучилдаг байна

Хөдөө аж ахуйн их сургууль ХБНГУ-ын “JD EAST” дадлага зуучлалын байгууллагын хамтын ажиллагааны гэрээг жилд авах оюутны тоог нэмэгдүүлэх болон хамрагдах оюутнуудыг бүрэлдэхүүний болон салбар сургуулиудаас хамруулахаар 2025 оны 11 дүгээр сарын 04-ний өдөр шинэчлэн байгууллаа. Гэрээг ХААИС-ийг төлөөлж Сургалт эрхэлсэн проректор А.Буянбаатар, ХБНГУ-ын “JD EAST” дадлага зуучлалын байгууллагыг төлөөлж тус хөтөлбөрийн захирал Ж.Жанибек нар гарын үсэг зурж баталгаажууллаа.
 Цаашид тус дадлагажих хөтөлбөрийг ХААИС-ийн Багш оюутны хөгжлийн газрын дарга А.Базарсад болон Агроэкологийн сургуулийн багш, доктор О.Отгонцэцэг нар хариуцан ажиллахаар болов.
 Хамтын ажиллагааны хүрээнд ХБНГУ-ын Жимсний аж ахуйн захирал доктор Маркус Шмит хүрэлцэн ирж ХААИС-тай танилцаж, оюутнуудад жимсний аж ахуй, орчин нөхцөл болон дадлагаар юу сурч болох талаар танилцуулсан бөгөөд энэ аж ахуйд 2023-2025 онд Агроэкологийн сургуулийн 26 оюутан маш сайн дадлагажсан тул дараагийн оюутнуудыг дахин дадлагажуулах хүсэлтэй байгаагаа илэрхийлсэн юм. Оюутнууд цалинтай дадлагажихаас гадна сүүлийн үеийн тоног төхөөрөмж, дэвшилтэт техник технологи ашиглах болон биологийн аргаар ургамал хамгаалах аргад суралцах зэрэг онолоор авсан мэдлэгээ практиктай хослуулан ажиллах боломжтойг дурдсан.

Дадлагажих оюутнууд ХБНГУ-ын хууль, журмын дагуу 1 цагийн хөлс 13,9 еврогоор цалинжиж, долоо хоногт доод тал нь 40 цаг дадлагажин ажиллахаар гэрээнд тусгагдсан байна.