ЭРҮҮЛ МЭНДИЙН ҮЙЛЧИЛГЭЭГ ГЭРЭЭР ҮЗҮҮЛЖЭЭ

Ковид-19 халдварын үед тодорхой бүсүүдэд эрүүл мэндийн үйлчилгээг гэрээр үзүүлжээ. Эрүүл мэндийн яам, Нийгмийн эрүүл мэндийн үндэсний төв, Дэлхийн эрүүл байгууллага хамтран Дархан-Уул аймаг, нийслэлийн Сонгинохайрхан дүүргийн 27, 9, 24, 15, 30, 23, 1, 26-р хороодын Өрхийн эрүүл мэндийн төвүүдэд “Халдварт бус өвчин/Зүрх судасны өвчнөөс урьдчилан сэргийлэх, хянах тусламж, үйлчилгээний зайлшгүй шаардлагатай багцыг эрүүл мэндийн анхан шатны тусламж, үйлчилгээний түвшинд нэвтрүүлэх MOНГПЕН загвар” төслийг 2018 оны 6-р сараас эхлэн хэрэгжүүлж эхэлсэн бөгөөд холбогдох байгууллагууд төслийг үргэлжлүүлэн хэрэгжүүлж буй юм. “Ковид-19” халдварын эрсдэл өндөртэй байгаа өнөө үед НЭМҮТ-ийн ЭМДӨУСА-ны дарга, мэргэжилтнүүд 2020 оны 7-р сарын 30-ны өдөр Сонгинохайрхан дүүргийн 10-р хорооны ӨЭМТ-д дэмжлэгт хяналт хийж ажиллажээ. Өрхийн эрүүл мэндийн төвийн их эмч нар тухайн дүүргийн хороодод  цусны даралт өндөртэй хяналтын иргэдэд гэрээр очиж эрүүл мэндийн үйлчилгээ үзүүлсэн юм. Төслийн үр дүнд эрүүл мэндийн үйлчилгээнд хамрагдсан иргэдийн биеийн байдал сайжирсан үр дүн гарч байсан. Тиймээс ч төслийг үргэлжлүүлэн явуулж буйг албаныхан хэлж байлаа. Түүнчлэн зүрх судасны өвчлөлийн хяналт сайжирч, уг өвчлөлөөс урьдчилан сэргийлэх, эрт илрүүлэх, эрсдэлийг бууруулах, эмчилгээний зөв сонголт, системтэй зөвлөгөө өгөх зэрэг үр дүн гарч, анхан шатны тусламж үйлчилгээ цахимд бүрэн шилжиж байгаад төслийн гол ач холбогдол оршиж байгаа юм байна.   Эх сурвалж: НЭМҮТ