Монгол улсын шилдэг хоршоологчдын чуулга уулзалт боллоо

Уур амьсгалын өөрчлөлтөөс үүдсэн сөрөг үр дагаврыг бууруулахад чиглэсэн “Шинэ хоршоо-Чинээлэг малчин” арга хэмжээний хэрэгжилтийг хангах ажлын хүрээнд малчин хоршоологчдод мэргэжил арга зүйн дэмжлэг үзүүлэх, чадавхжуулах чиглэлээр 2026 оны 01 сарын 26-ны өдөр шилдэг хоршоологчдын туршлага судлах чуулга уулзалт зохион байгуулагдлаа.

Тус чуулга уулзалтад “Шинэ хоршоо хөдөлгөөн”-ний хүрээнд зээлд хамрагдсан 21 аймгийн 1000 орчим хоршоологч оролцсон юм.

Уулзалтаар малын гаралтай бүтээгдэхүүнийг эцсийн бүтээгдэхүүн болгон бэлтгэж экспортод гаргах, нэмүү өртөг шингээн үйлдвэрлэхэд хамтын хөдөлмөрийн дээд хэлбэр болох хоршоо чухал үүрэгтэй байгааг онцолсон юм.

Мөн аймгийн улсын бүртгэлийн байгууллагад бүртгүүлсэн нь хоршоолж ажиллах малчид, иргэдийн бүтээлч хамтын ажиллагаа идэвхжиж байгаа цаашид дундын хоршоологчдын үйл ажиллагааг дэмжих, хөрш орнуудад туршлага судлах, мөн бэлчээрийн болон мал аж ахуйн холбоотой тулгамдсан асуудал, санал шийдлийн талаар хоршоологчдын дунд хэлэлцүүлэг өрнүүллээ.

“Шинэ хоршоо хөдөлгөөн” нь Монгол Улсын Засгийн Газрын үйл ажиллагааны хөтөлбөрт тусгагдсан зорилтын хүрээнд уламжлалт мал аж ахуйг хөгжүүлэх, мал аж ахуйн бүтээгдэхүүн үйлдвэрлэлтийг дэмжих, малчдын хөдөлмөр эрхлэлтийг нэмэгдүүлэх, улмаар хоршооны тогтолцоог хөгжлийн төлөвлөгөөтэй уялдуулан бэхжүүлэхэд чиглэсэн үндэсний хэмжээний санаачилга юм.

Хөдөлгөөнд хамрагдсанаар мал аж ахуй болон хөдөө аж ахуйн салбарын нэмүү өртөг шингэсэн бүтээгдэхүүн үйлдвэрлэлтийг нэмэгдүүлэх, малын гаралтай бүтээгдэхүүний эрэлт, мөнгөн урсгалыг тогтмолжуулах, байгалийн бэрхшээлийг хамтын хүчээр даван туулах зорилготой бөгөөд жишиг хоршоологчдын үйл ажиллагааг дэмжиж малын гаралтай бүтээгдэхүүн үйлдвэрлэлтийн экспортыг  нэмэгдүүлэх зорилготой юм.

Тус хөдөлгөөнд 2026 оны 26 мянга гаруй хоршоологчид хамрагдаж үйл ажиллагаагаа явуулж байна.