БНСУ-аас Монгол улсад суугаа онц бөгөөд бүрэн эрхт элчин сайдтай уулзлаа

Солонгост сургууль төгсөгчдийн холбоо(MAGIKO)-ны төлөөлөл (2026 оны 2 дугаар сарын 25-ны өдөр)  Бүгд Найрамдах Солонгос Улсаас Монгол Улсад суугаа Онц бөгөөд Бүрэн эрхт Элчин сайд Чой Жин Вон-той албан уулзалт хийлээ.

Уулзалтын үеэр Элчин сайд Чой Жин Вон нь холбооны төлөөллийг хүлээн авч, 2026 онд хэрэгжүүлэх үйл ажиллагааны нэгдсэн төлөвлөгөө, цаашдын стратеги зорилт, хоёр орны хамтын ажиллагааг өргөжүүлэх чиглэлүүдийн талаар санал солилцсон байна. Уулзалтаар, 

• Солонгост сургууль төгсөгчдийн холбоо(MAGIKO)-оос 2026 онд хэрэгжүүлэх холбооны нэгдсэн үйл ажиллагааны төлөвлөгөө;

• MAGIKO-ийн 20 жилийн ойн хүрээнд зохион байгуулагдах олон улсын болон үндэсний хэмжээний арга хэмжээ, 
• Боловсрол, шинжлэх ухаан, инноваци, бизнес, орон нутгийн хөгжлийн чиглэлээр хэрэгжүүлэх хамтын ажиллагааны шинэ санаачилгууд; 
• Төгсөгчдийн мэдлэг, туршлага, мэргэжлийн чадавхыг хоёр орны хамтын ажиллагаанд бодит үр дүнтэй ашиглах боломж зэрэг асуудлыг хэлэлцжээ.  Мөн Элчин сайд Монгол Улсад хэрэгжүүлж буй бодлого, санаачилга, цаашдын хамтын ажиллагааны чиглэлүүдийн талаар санал солилцож, хоёр улсын боловсрол, эрдэм шинжилгээ, инноваци, бизнесийн хамтын ажиллагааг шинэ шатанд гаргахад төгсөгчдийн оролцоо, манлайлал онцгой ач холбогдолтойг тэмдэглэлээ. 

Талууд бодит үр дүнд чиглэсэн, шат дараатай, тогтвортой хамтын ажиллагааг хэрэгжүүлэх чиглэлээр санал нэгдэж, 2026 онд Элчин сайдын яамтай нягт уялдаа холбоотой хамтран ажиллахаар тохиролцжээ. 

Энэхүү уулзалт нь 2026 онд хэрэгжүүлэх ажлуудын уялдаа холбоог хангах, хоёр орны болон иргэд хоорондын харилцаанд тулгамдаж буй асуудлуудыг судалгаанд суурилан шуурхай шийдвэрлэх, хамтын ажиллагааг стратегийн түвшинд өргөжүүлэх ач холбогдол бүхий уулзалт боллоо. 

Цагаан сарын баярын дараах анхны албан уулзалтаар Солонгост сургууль төгсөгчдийн холбооны төлөөллийг хүлээн авч уулзсан БНСУ-аас Монгол Улсад суугаа Онц бөгөөд Бүрэн эрхт Элчин сайд Чой Жин Вон болон Элчин сайдын яамны хамт олонд нийт төгсөгчдийн нэрийн өмнөөс талархал илэрхийлж, цаашдын ажил үйлсэд нь өндөр амжилт хүссэн юм. Энэхүү уулзалт нь хоёр орны найрсаг харилцаа, хамтын ажиллагааны уур амьсгалыг улам бататгасан ач холбогдолтой арга хэмжээ боллоо.