Солонгост сургууль төгсөгчдийн холбоо ХЭҮК-тэй хамтран ажиллах санал солилцлоо

Солонгост сургууль төгсөгчдийн холбоо (MAGIKO) нь Монгол Улсын Хүний эрхийн Үндэсний Комисстой хамтын ажиллагааг хөгжүүлэх зорилгоор санал солилцох уулзалтыг 2026 оны 3 дугаар сарын 04-ний өдөр зохион байгууллаа.  Уулзалтын үеэр гадаадад, ялангуяа Бүгд Найрамдах Солонгос Улсад ажиллаж, амьдарч буй Монгол иргэдийн хүний эрх, хөдөлмөрийн эрхийг хамгаалах, тэдний аюулгүй, нэр төрд нийцсэн ажиллах, амьдрах орчныг бүрдүүлэх чиглэлээр хамтын ажиллагааг өргөжүүлэх талаар санал солилцов.

Мөн БНСУ-д оршин суугаа Монгол иргэдийн хүүхдийн эрх ашгийг хамгаалах, боловсрол, эрүүл мэнд, нийгмийн хамгааллын үйлчилгээний хүртээмжийг судалж бодлогын санал боловсруулах, гадаадад амьдарч буй иргэдийн тулгамдсан асуудлыг сонсох зорилгоор уулзалт, хэлэлцүүлгийг тогтмол зохион байгуулах, хүний эрхийн зөрчил, эрсдэлийг судалж холбогдох байгууллагад уламжлах механизмыг хамтран бүрдүүлэх талаар ярилцлаа.

Түүнчлэн гадаадад оршин суугаа Монгол иргэдийн эрхийг хамгаалах чиглэлээр төрийн болон төрийн бус байгууллагуудын хамтын ажиллагааг өргөжүүлэх, мэдээлэл солилцох сүлжээ бий болгох, мөн Монгол Улсад ажиллаж, амьдарч буй Бүгд Найрамдах Солонгос Улсын иргэдийн хүний эрх, хууль ёсны ашиг сонирхлыг хүндэтгэн хамгаалах, харилцан ойлголцолд тулгуурласан хамтын ажиллагааг дэмжих талаар санал солилцлоо. Мөн бодлогын баримт бичиг, мэдээллийн хүртээмжийг нэмэгдүүлэх, гадаадын иргэдэд зориулсан баталгаатай мэдээллийг солонгос хэл дээр бэлтгэн хүргэх, Монгол иргэдийн БНСУ-ын визтэй холбоотой тулгамдсан асуудлыг шийдвэрлэх боломжийн талаар харилцан ярилцсан байна.