УБ-Өмнөговийн чиглэлд анхны тусламжийн цэг ажиллаж эхэлжээ

Улаанбаатар хотоос Өмнөговь аймгийн чиглэлд Төв  аймгийн ногоон Довын даваа, Дундговь аймгийн Дэлгэрцогт, Луус, Хулд сум, Өмнөговь аймгийн Цогт-Овоо сумд дахь замын хажуугийн үйлчилгээний газрууд болон Төв, Дундговь, Өмнөговь аймгийн авто замд  байрлах цагдаагийн хяналтын 5 цэгийг   түшиглэн  “Анхны тусламж”-ийн цэг байгуулжээ. Энэ ажлын хүрээнд  олон нийтэд анхны тусламжийн мэдлэг олгох сургалтанд тухайн хэсэгт ажиллаж буй цагдаагийн албан хаагч, Авто зам засвар арчлалтын компанийн, Төлбөр хураах цэгийн албан хаагч, ажилчид, иргэд зэрэг нийт 198 хүнийг хамруулж,  осол, гэмтлээс урьдчилан сэргийлэх, гэмтсэн үед үзүүлэх анхан шатны тусламжийг хэрхэн зөв хийх талаарх гарын авлагаар хангажээ. Уг ажлыг Зам, тээврийн хөгжлийн яамнаас Эрүүл мэндийн яам, Тээврийн цагдаагийн алба, , Монголын Улаан загалмайн нийгэмлэг, “Авто тээврийн үндэсний төв” ТӨҮГ-ын хамтын ажиллагааны хүрээнд “Замын хөдөлгөөний аюулгүй байдлыг хангах үндэсний хөтөлбөр”-ийг хэрэгжүүлэх үйл ажиллагааны төлөвлөгөө болон Монгол Улсын Засгийн газрын 2018 оны 163 дугаар тогтоолоор батлагдсан “Осол, гэмтлээс сэргийлэх үндэсний хөтөлбөр”-ийг хэрэгжүүлэх зорилгын хүрээнд явуулжээ. Монгол Улсын хэмжээнд жилд дунджаар 500 гаруй хүн зам, тээврийн ослын улмаас амь насаа алдаж байна. Зам тээврийн ослоор амиа алдсан хүний 70 орчим хувь нь анхны тусламж авч амждаггүйн улмаас нас бардаг гэсэн олон улсын судалгаа байдаг. Тиймээс ч хөдөө орон нутаг зам дагуу анхны тусламжийн төв байх шаардлага зүй ёсоор тулгарч байгаа юм. Цаашид ч нэмэгдүүлэх чиглэлд анхаарах шаардлагатай байгааг холбогдох хүмүүс онцолж байна.