БУЛГАН АЙМАГ: Амны хөндийн зөв дадлыг хэвшүүлэх, шүд угаалтыг таниулах тэмцээнд 64 сурагч хамрагдлаа

“Эрүүл Булган” хөтөлбөрийн хүрээнд “Шүд угаалтын аварга” шалгаруулах тэмцээн Хишиг-Өндөр суманд зохион байгуулагдлаа. Эрүүл мэндийн сайд болон Боловсрол, шинжлэх ухааны сайдын хамтарсан А/25, А/27 дугаар тушаал “Эрүүл шүд” арга хэмжээ, аймгийн Засаг даргын “Эрүүл Булган” хөтөлбөрийн хэрэгжилтийг хангах зорилгоор Хишиг-Өндөр сум “Шүд угаалтын аварга” шалгаруулах тэмцээнийг амжилттай зохион байгууллаа. 

Тус тэмцээнд Ерөнхий боловсролын сургуулийн 4–7 дугаар ангийн нийт 64 сурагч оролцож, амны хөндийн эрүүл ахуйн, зөв дадал хэвшлийг төлөвшүүлэх, шүд угаалтын зөв техник эзэмших, амны хөндийн өвчлөлөөс урьдчилан сэргийлэх, эрүүл мэндийн мэдлэг, боловсрол, ур чадвараа нэмэгдүүлсэн тэмцээн боллоо. 

Амны хөндийн эрүүл ахуйн, зөв дадлыг хэвшүүлж, эрүүл шүдтэй Монгол хүн бүрийг бий болгоход Ц.Бадрал сан санаачлага гарган, сүүлийн 10 гаруй жил тууштай үйл ажиллагаа явуулж 100 мянга гаруй хүнд шүдний эмчилгээ, оношлогоо үйлчилгээг хүргэн ажиллаад буй юм. Булган аймгийн Хишиг-Өндөр суманд зохион байгуулагдсан тус арга хэмжээг мөн “Ц.Бадрал сан”-гаас дэмжиж хамтран ажиллаа. 

Тэмцээнд орологч, зохион байгуулагчдын зүгээс цаашид хүүхэд, өсвөр үеийнхний амны хөндийн эрүүл мэндийг дэмжих, зөв дадал хэвшлийг төлөвшүүлэх чиглэлээр хэрэгжүүлэх арга хэмжээг хүртээмжтэй болгох шаардлагатайг онцолж байлаа.