Солонгос улсад зорчих визний нөхцөл, хүртээмжийг сайжруулах чиглэлд ажиллана

Монгол Улсын иргэдийн Бүгд Найрамдах Солонгос Улс руу зорчихтой холбоотойгоор визийн материал бүрдүүлэх, мэдүүлэх, виз олголт, хил нэвтрэх үе шатанд тодорхой хүндрэл, бэрхшээл үүссээр байна. Эдгээр асуудлыг судалгаа, дүн шинжилгээнд тулгуурлан цогцоор нь авч үзэх, визийн нөхцөл, хүртээмж, ойлголцлыг сайжруулах, холбогдох байгууллагуудын хамтын ажиллагааг уялдуулах зорилгоор нэгдсэн зохион байгуулалт бүхий ажлын хэсгийн Солонгост сургууль төгсөгчдийн холбооны дэргэд байгуулан ажиллаж байна. Ажлын хэсгийг Солонгост сургууль төгсөгчдийн холбооны тэргүүн С. Бат-Эрдэнэ (Ph.D) ахалж, гишүүдээр Солонгост сургууль төгсөгчдийн холбооны гишүүд ажиллаж байна.  Ажлын хэсэг нь Монгол Улсын иргэдийн БНСУ-д зорчих визтэй холбоотой үүсэж буй асуудлыг нэгтгэн судлах, иргэдээс мэдээлэл цуглуулах, нөхцөл байдлын үнэлгээ хийх, бодлогын санал боловсруулах, холбогдох талуудтай хамтран шийдэл боловсруулахад чиглэн ажиллана.  Судалгааны үр дүнг нэгтгэн боловсруулж, БНСУ-аас Монгол Улсад суугаа Элчин сайдын яаманд албан ёсоор танилцуулж, хэрэгжилтийг хангах чиглэлээр ажиллах юм. 

Солонгост сургууль төгсөгчдийн холбооны 20 жилийн ой энэ жил тохиож байгаа бөгөөд ойн хүрээнд хоёр улсын хамтын ажиллагааг улам бүр нэмэгдүүлэх, тулгамдаж буй асуудлыг шийдвэрлэх чиглэлд шат дараатай арга хэмжээ зохион байгуулж ажиллаж байна. Энэ хүрээнд Солонгос улсад зорчих визтэй холбоотой асуудлыг анхаарч,  судалгаанд тулгуурласан санал хүсэлтийг боловсруулан ажиллаж буй юм.