Асан хот Солонгост сургууль төгсөгчдийн холбоог дэмжин хамтран ажиллана

Солонгост сургууль төгсөгчдийн холбоо (MAGIKO) нь Бүгд Найрамдах Солонгос Улсын Асан хот болон Асан хотын Хөдөө аж ахуйн хоршоодын холбооны зөвлөлийн хамт хамтын ажиллагааны санамж бичиг байгууллаа.

Энэхүү санамж бичгийн хүрээнд Асан хот болон тус хотын Хөдөө аж ахуйн хоршоодын холбооны зөвлөлөөс Солонгост сургууль төгсөгчдийн холбооны үйл ажиллагааг дэмжих, мөн холбооны 20 жилийн ойн хүрээнд зохион байгуулагдах арга хэмжээнүүд болон төгсөгчдийн санаачлан хэрэгжүүлж буй төсөл, хөтөлбөрүүдийг бодит дэмжлэгээр ханган хамтран ажиллахаар харилцан тохиролцлоо.

Түүнчлэн энэхүү 20 жилийн ойн хүрээнд БНСУ-ын хотын захиргааны түвшинд албан ёсоор санамж бичиг байгуулан хамтран ажиллаж буй нь анхны тохиолдол болж буйгаараа онцлог, өндөр ач холбогдолтой үйл явдал юм.

Асан хот нь БНСУ-ын Чүнчоннам-ду аймагт байрлах, хурдацтай хөгжиж буй хотуудын нэг бөгөөд хөдөө аж ахуй, хүнсний үйлдвэрлэл, өндөр технологийн салбарыг хослуулан хөгжүүлж буйгаараа онцлогтой. Тус хот нь “Asan Malgeun” брэндийн чанартай цагаан будаа болон бусад хөдөө аж ахуйн бүтээгдэхүүнээрээ улсдаа танигдсан бөгөөд орон нутгийн хоршоодын тогтолцоо өндөр хөгжсөн, фермерүүдийг дэмжсэн бодлого, инновацид суурилсан үйлдвэрлэлийн тогтолцоог амжилттай хэрэгжүүлж байна.

Мөн Асан хот нь гадаад хамтын ажиллагааг идэвхтэй дэмждэг, олон улсын түншлэлд нээлттэй бодлого хэрэгжүүлдэг хот бөгөөд Монгол Улстай боловсрол, хөдөө аж ахуй, орон нутгийн хөгжил, хүний нөөцийн солилцооны чиглэлээр хамтын ажиллагааг өргөжүүлэх өргөн боломжтой юм.