ЦЕГ-ын Урьдчилан сэргийлэх албаны алба хаагчид 1170 ширхэг мод суулгалаа

Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөний хүрээнд байгаль орчноо хамгаалах, ногоон байгууламжийг нэмэгдүүлэх, зорилготой “Байгальд өгсөн бүхэн буцаад ирдэг” мэдээлэл, нөлөөллийн ажил, арга хэмжээг зохион байгуулж байна.

Аяны хүрээнд Цагдаагийн ерөнхий газрын Урьдчилан сэргийлэх албаны алба хаагчид өнөөдөр /2026.05.17/ Баянзүрх дүүргийн 28 дугаар хорооны нутаг дэвсгэрт байрлах “Олон Улсын Эко цэцэрлэгт хүрээлэн”-д 1170 ширхэг мод тарьж, ногоон байгууламжийг нэмэгдүүлэх, байгаль орчноо хамгаалах үйлсэд хувь нэмрээ орууллаа.

Мод тарих нь зөвхөн байгаль хамгаалах ажил бус уур амьсгалын өөрчлөлтийг сааруулах, цөлжилтийг бууруулах, хөрс, усны нөөцийг хамгаалах, ирээдүй хойч үедээ эрүүл аюулгүй орчныг өвлүүлэх чухал ач холбогдолтой юм.

Нэг хүний тарьсан ганц мод өнөөдрийн жижиг үйлдэл мэт боловч маргаашийн ногоон ирээдүйн эхлэл болдог. Хүн бүрийн сэтгэл, оролцоо, арчилж ургуулсан нэг модноос “Тэрбум мод” эхэлнэ.

Хойч үедээ үлдээх эрүүл, ногоон ирээдүйг хамтдаа бүтээцгээе