Н.Өнөрцэцэг сэтгүүлч, хуульч нараас дэмжлэг хүслээ

Авилгажсан төртэй, нөлөөлөлд орсон хуулийн байгууллагтай нөхцөлд сэтгүүлч ганцаараа баримтаа хамгаалах ярвигтай байгаа учраас сэтгүүлч Н.Өнөрцэцэг хэвлэл мэдээллийн салбарынхан болон хуульчдаас дэмжлэг хүслээ. Сэтгүүлч Н.Өнөрцэцэг нь УИХ-ын гишүүн асан Ц.Гарамжав 10 тэрбум төгрөгийн өр зээлээ Монгол банкны Эрсдлийн сангаар төлүүлсэн талаар мэдээллэж байсан юм. Сэтгүүлчийн гаргасан уг мэдээлэлтэй холбогдуулан УИХ-ын гишүүн асан Ц.Гарамжав, нэр төрд халдсан асуудлаар өнгөрсөн 2019 оны 7 дугаар сараас хойш удаа дараа цагдаагийн байгууллагт хандаж сэтгүүлчийг шалгуулсан байдаг. Гэвч тухайн үед гишүүн асны өргөдлүүд хэрэгсэхгүй болж хаагдсан байдаг юм. Гэтэл тухайн нэр төрд халдсан гэх өргөдлөө Иргэний шүүхэд ахин гаргажээ. Мөн Ц.Гарамжавт холбогдох хэрэг нууцын зэрэглэлтэй болсон бөгөөд, сэтгүүлчийн хувийн фэйсбүүк болон твиттер хаягт үзлэг хийх шүүгчийн шийдвэр нууцын зэрэглэлтэй гарсан байна. Энэ талаар сэтгүүлч өөрийн фэйсбүүк хуудсандаа нийтэлсэн байдаг. Хувь хүний орон зай хүртэл халдаж, хэрэгт холбогдох мэдээллийг нууцалж байгаа нь хүн бүр хуулийн өмнө ижил тэгш байх боломжийг алдагдуулж байгаа учир хэвлэл мэдээллийн салбарынхан болоод хуульчдыг дэмжлэг үзүүлж ажиллахыг хүсч буйгаа ил захидалдаа дурджээ.