10 000 ширхэг тамхины хогийн сав үнэгүй тараана

Цагдаагийн ерөнхий газрын экологийн цагдаагийн албанаас хэрэгжүүлсэн “Хогоор бүү хорло” аяны хүрээнд “ТАМХИНЫ ХОГГҮЙ ХОТЫГ БҮТЭЭЕ” санаачлагыг хэрэгжүүлж байна. Тохижилт үйлчилгээний компанийн ажилчдын ажлыг хүндрүүлдэг авто машинтай иргэдийн буруу дадал зуршил болсон тамхины иш цонхоор хаях зөрчлийг бууруулах хүрээнд 10 000 ширхэг утаат тамхины хогийн савыг үнэгүй тараах юм. PC mall ХХК нийгмийн хариуцлагын хүрээнд уг арга хэмжээнд нэгдэж, цахим орчинд идэвхтэй үйл ажиллагаа явуулдаг автомашин сонирхогчдын групп болон PC mall ХХК-ны худалдааны төвүүдээр дамжуулан үнсний савыг үнэгүй болон урамшуулах хэлбэрээр тараах юм байна. Дашрамд дурдахад, Монгол Улсын зөрчлийн тухай хуулийн 5.1 дүгээр зүйл “Олон нийтийн газарт зүй бусаар биеэ авч явах” зөрчлийн 1-д зааснаар “Олон нийтийн газар, авто зам, орон сууцны орчны газар, гудамж, талбайд бие зассан, эсхүл нус, цэр, тамхины иш, хог хаясан бол хүнийг арван нэгжтэй тэнцэх хэмжээний төгрөгөөр торгоно” гэж тусгасан байдаг ба Цагдаагийн байгууллагаас 2019 онд 1400 зөрчил гаргагчид торгууль ногдуулж ажилласан байна.