ЗГ: 11 аймаг руу 93,000 тун вакцин хүргэх ажил эхэллээ

Өнөөдөр 11 аймаг руу 93,000 тун вакцины тээвэрлэлтийг цагдаагийн хамгаалалттайгаар түгээж  байна. Хөдөө орон нутагт 18-50 насны 808,284 хүн, 50-аас дээш насны 305,950 хүн амьдарч байгаагаас 2021 оны 5 дугаар сарын 1-ний өдрөөс эхлэн 50-аас дээш насны иргэдийг вакцинжуулах ажлыг эхлүүлсэн. Өнөөдрийн байдлаар орон нутагт вакцинд хамрагдах 18-аас дээш насны 1,114,234 хүн байгаагаас 174,903 нь вакцины нэгдүгээр тун, 47,553 нь хоёрдугаар тунд хамрагдаад байгаа юм. Засгийн газраас 2021 оны 7 дугаар сар гэхэд хөдөө орон нутагт ажиллаж, амьдарч байгаа иргэдийг бүрэн вакцинжуулж дуусахаар зорьж байна. Өнөөдөр  нэмэлтээр, Өмнөговьд 14,000 тун, Сүхбаатарт 8,000 тун, Ховд аймаг 13,000 тун, Архангайд 10,000 тун, Говьсүмбэрт 4,000 тун, Баянхонгорт 10,000 тун, Хэнтийд 6,000 тун, Дорноговьд 13,000 тун, Төв аймагт 6,000 тун, Дундговьд 5,000 тун, Дархан-Уулд 4,000 тун нийт 11 аймгийн 18 эмнэлгийн машин, 7 цагдаагийн машинаар 93,000 тун вакцин түгээгдэнэ. Зарим алслагдсан аймгууд руу мөн нэмж илгээхээр бэлтгэж байна.