Зургаан хүүхэд тутмын нэг нь хөдөлмөр эрхэлж байна

ОУХБ, НҮБ-ын Хүүхдийн сангийн 2021 онд хамтарч хийсэн судалгаагаар дэлхий даяар хөдөлмөр эрхэлж байгаа хүүхдийн тоо анх удаагаа 160 сая болж өсчээ. Энэ нь 10 хүүхэд тутмын нэг нь хөдөлмөр эрхэлж байна гэсэн үг юм. Мөн тэдний 79 сая буюу тал хувь нь хүнд хортой нөхцөлд хөдөлмөр эрхэлж байгааг судалгаанд дурджээ. Монгол улсын хувьд 2000-аад онд аюултай ажил эрхэлж буй хүүхдүүдийн тоо 4 дахин буурсан дүнтэй байсан бол сүүлийн жилүүдэд эдийн засгийн үйл ажиллагаанд оролцож буй 10-14 насны хүүхдүүдийн тоо нэмэгджээ. Судалгаагаар 5-17 насны зургаан хүүхэд тутмын нэг нь хөдөлмөр эрхэлдэг, тэр дундаа хөдөө аж ахуй, барилга, уул уурхайн салбарт аюултай ажил хөдөлмөр эрхлэх нь түгээмэл байна. Жил бүрийн 6 дугаар сарын 12-нд Хүүхдийн хөдөлмөрийг устгах дэлхийн өдөр тохиодог. Энэ өдрийг угтан ОУХБ-ын санаачлагаар “Хүүхдийн хөдөлмөрийг устгая” цахим хэлэлцүүлгийг холбогдох байгууллагуудтай хамтран зохион байгуулсан бөгөөд уг хэлэлцүүлгээс гарсан ил захидлыг олон нийтэд танилцууллаа. Хүүхдийн хөдөлмөр эрхлэлт дэлхий даяар нэмэгдэж, тэвчишгүй хөдөлмөр эрхэлж буй хүүхдийн тоо өндөр байгааг анхаарч, цаашид хүүхдийн хөдөлмөрийн бүх хэлбэрийг устгах үйл ажиллагаанд нэгдэхийг Засгийн газар, бизнес эрхлэгчид, ард иргэдээсээ хүсч буйг ил захидалд дурджээ. "Хүүхдийн хөдөлмөрийг устгая" цахим хэлэлцүүлэгт  Хөдөлмөр, нийгмийн хамгааллын яам, Хүний эрхийн Үндэсний Комисс,  НҮБ-ын Монгол дахь Суурин төлөөлөгчийн газар, Монголын Ажил Олгогч Эздийн Холбоо, Монголын Үйлдвэрчний Эвлэлийн Холбооны төлөөлөл оролцлоо.