ЗГ: Үндэсний баяр наадмыг хойшлуулж, 9 хоногийн амралтыг хэвээр үлдээлээ

ШУУРХАЙ: Засгийн газрын ээлжит бус хуралдаанаас Үндэсний баяр наадмыг хойшлуулах шийдвэр гаргалаа. Мөн иргэдийн 9 хоног амрах шийдвэрийг хэвээр үлдээлээ. Цахим наадмыг эсэргүүцсэн иргэд #NoNaadam тайван жагсаалыг Сүхбаатарын талбайд хийж эсэргүүцлээ илэрхийлээд байсан юм. Энэ дагуу Улсын Онцгой комиссын 7 дугаар сарын 1-ний өдрийн хуралдаанаар Үндэсний их баяр наадмыг хойшлуулах саналыг Засгийн газарт хүргүүлээд байсан юм. Улсын Онцгой комисс нь цар тахлын тархалтыг хумих, бууруулах арга хэмжээ авах ард түмний шаардлагыг харгалзан үзэхийн зэрэгцээ Эрүүл мэндийн яам, эрдэмтэн судлаачдын дүгнэлтэд үндэслэн Үндэсний их баяр наадмыг нэгж жилээр хойшлуулах шийдвэр гаргасныг албаныхан мэдээлж байна. Мөн наадмын өдрүүдэд ес хоног амрах шийдвэрийг хэвээр үлдээсэн байна. Нэмж мэдээлэхэд, Нийтээр тэмдэглэх баярын болон тэмдэглэлт өдрүүдийн тухай хуульд Үндэсний их баяр наадмаар 11-15-нд амрахаар заасан байдаг. Энэ жилийн тухайд долдугаар сарын 16-н Баасан гарагт таарч байгаа тул тус ажлын өдрийг долдугаар сарын 24-ний өдөрт шилжүүлэхээр Засгийн газар шийдвэрлэсэн юм.