46 иргэнийг усны аюулаас аварчээ

Нийслэлийн онцгой байдлын газраас голын усны аюулаас урьдчилан сэргийлэх сэрэмжлүүлэг яриаг 17958 иргэнд хүргэж, ногоон бүсээс 2920 автомашин холдуулж, 4756 ширхэг зөвлөгөө, мэдээлэл тараажээ. Хөдөлгөөнт эргүүлээр үүрэг гүйцэтгэх хугацаанд нийт 46 иргэнийг гол, усны аюулаас авран хамгаалж, таван автомашиныг голд суусан байсныг татаж гаргасан байна.  Мөн  гол, усны холбогдолтой нийт 12 удаагийн дуудлагаар 116 алба хаагч, 23 автомашин, 22 завьтай нийт 29 иргэнийг голын усанд автомашинтай суусан, боогдсон байсныг авран хамгаалж, усанд эндсэн долоон иргэнийг эрэн хайж, цагдаагийн байгууллагад хүлээлгэн өгөв. Түүнчлэн нэг иргэнийг уснаас эрэн хайх эрлийн ажиллагаа үргэлжилж байгааг тус албанаас мэдээллээ. Тиймээс иргэдийг усны ослоос урьдчилан сэргийлэхийг анхааруулж байна. Нийслэлийн Онцгой байдлын газарт энэ сарын 11-18-ны хооронд гал түймрийн 17, аврах ажиллагааны 12 дуудлага ирсэн байна. Туул, Хэрлэн, Тэрэлж голын эрэг дагуу болон голоор хөдөлгөөнт завьт эргүүлээр Аврах анги, дүүргийн Онцгой байдлын хэлтсийн Гал түймэр унтраах, аврах ангиудын давхардсан тоогоор 421 алба хаагч, дүүргүүдийн цагдаагийн 61 алба хаагч, Гэр бүл, хүүхэд, залуучуудын хөгжлийн газрын 36 алба хаагч 80 автомашин, 36 завьтай үүрэг гүйцэтгэж байна.