75 их, дээд сургуулийн дунд вакцинжуулалтын явуулын баг ажиллаж байна

Нийслэлийн хэмжээнд 11 сарын 29-ний байдлаар 344.374 иргэн вакцины нэмэлт 3-р тундаа хамрагдаад байгаа бөгөөд энэ нь зорилтот бүлгийн 32 хувийг бүрдүүлж байгаа юм. Нэмэлт 3-р тунд хамрагдах иргэдийн идэвхийг сайжруулах зорилгоор вакцинжуулалтын цэгийн тоог нэмэгдүүлэн, иргэдэд хүртээмжтэй байлгах үүднээс түр цэг, явуулын багуудыг зах, худалдааны төв, их, дээд сургуулиудад ажиллуулж эхэлсэн. Тодруулбал, өчигдөр буюу 11 сарын 29-нөөс эхлэн нийслэлийн хэмжээнд нийт 75 их, дээд сургуулийн дунд явуулын 37 багийг ажиллуулан, оюутан, залуусыг вакцинд хамруулж байна. Тус 75 сургуульд нийт 138.822 оюутан суралцаж байгаагийн 19.800 орчим нь 3-р тундаа хамрагджээ. Нийслэлийн Эрүүл мэндийн газрын зүгээс оюутан, залууст хандан вакцин хийлгэхээсээ өмнө заавал хоолоо идсэн байх, биеийн хүчний ажил болон дасгал хийгээгүй байх, даралтаа тогтвортой байлгах гэсэн ерөнхий шаардлагуудыг тавьж байгаа аж. Дархлаажуулалтын явуулын баг 12-р сарын 1-нийг дуустал их, дээд сургуулиудад ажиллах юм.