Б.Мөнхжин: Туршилт амжилттай болсон тул Эрээний хилийг маргааш нээнэ

Гадаад харилцааны дэд сайд болон Эрээний ерөнхий консул, төрийн бусад холбогдох албаны мэргэжилтнүүд хамтран өчигдөр /2021.12.08-нд/ хил дээр очиж ажиллан туршилт хийсэн байна. Уг туршилтаар чингэлэг солилцох, тээвэрлэх бэлтгэл бүрэн хангагдсан талаар мэдээллээ. Гадаад харилцааны дэд сайд Б.Мөнхжин хэлэхдээ, Туршилт амжилттай болсон учир маргааш хил нээж, автозамын тээврийг хэвийн үргэлжлүүлнэ. Эхний ээлжид Covid-19 халдварын тохиолдол бүртгэгдэхээс өмнө ачаа бараатайгаа нэвтрээд хил дээр саатсан байгаа ачаатай машинуудыг гаргасны дараа  чингэлэг тээврийн асуудал яригдана. Одоогоор Эрээний талд гарсан байгаа 150 машин бий. Чингэлэг тээвэр дээр дахин асуудал үүсэхгүй. Харин Гашуунсухайтын хувьд халдвар хамгаалалтын асуудал хүнд байгаа учир халдварын эсрэг дэглэмийг сайтар баримталж чадвал Хятадын талаас ямар нэг хориг байхгүй гэлээ. Түүнчлэн, Солонгосоос ирж байгаа каргонууд Тяньжин дээр саатсан. Нийт 4800 гаруй чингэлгийг татах шаардлагатай байгаа. Өдөрт гурван чингэлэг татахад хоёр чингэлэг тогтмол нэмэгдэж байгаа гэв.