Б.Мөнхжин: Эрээн хилээ хаагаагүй

Замын-Үүд дэх Гаалийн газар 12 сарын 11-ээс эхлэн автозамын боомтоор хилийн дундын бүсээс татан авч буй бараа, тээврийн хэрэгслийг нэвтрүүлж эхэлсэн. Гэвч БНХАУ-аас нэмэлт шаардлага тавьж, Эрээний хилийг дахин тодорхойгүй хугацаагаар хаасан талаар мэдээлэл цацагдаад байгаа юм. Уг асуудалтай холбоотойгоор Гадаад харилцааны дэд сайд Б.Мөнхжин өнөөдөр мэдээлэл хийлээ. Тэрбээр, "Энэ сарын 8-ны өдөр би Замын-Үүд боомт дээр очиж ажилласан. Бэлтгэл хангагдсан байсаэ. Тиймээс 12 дугаар сарын 10-11-нд  тээврийн хэрэгслийг эрээн талаас дундын цэг дээр байршуулсан. Өнгөрсөн Ням гарагт дундын цэг дээр очсон 50 орчим автомашиныг монголын талаас очиж авсан. Энэ бол хил нээгдсэний нотолгоо юм. Гэхдээ эрээний тал дээр хүндрэл үүссэн нь үнэн. Тухайлбал, автомашинууд цаг агаарын байдлаас шалтгаалаад асахгүй байх тохиолдол гарсан. Ачаатай тэрэгнүүд гаалийн бүрдүүлэлт, бодит автомашин дээрх ачааны жин, хэмжээ зөрөх асуудал үүссэн. Иймээс эхний ээлжид гарах боломжгүй болсон байна. Энэ хугацаанд Хятад улс үнэлгээ хийж байгаа юм. Өчигдөр, өнөөдөр үнэлгээ хийгээд, дүгнэлт нь гарч байна. Эрээн буцаад хаалгаа хаасан юм биш. Бараа бүтээгдэхүүн эргэлтэд орох үе шаттай ажлын процесс явагдаж байна" гэлээ.