Шинээр төрсөн хүүхдээ асрахад аавуудад ажлын 10-аас доошгүй өдрийн цалинтай чөлөө олгохоор хуульчилжээ

Хөдөлмөрийн тухай хуулийн шинэчилсэн найруулга ирэх оны нэгдүгээр сарын 1-ний өдрөөс хэрэгжиж эхэлнэ. Тус хуулийн 137.5. "Эцэгт шинээр төрсөн хүүхдээ асрахад нь зориулан ажлын 10-аас доошгүй өдрийн чөлөөг ажил олгогч олгож, тухайн хугацааны дундаж цалин хөлстэй тэнцэх хэмжээний олговор олгоно." гэжээ. Түүнчлэн хүүхэд асрах чөлөө олгох тухайд: Гурав хүртэлх насны хүүхэдтэй эх, эцэг өөрөө хүсэлт гаргасан бол ажил олгогч түүнд хүүхэд асрах чөлөө олгох бөгөөд энэ хугацаанд тэтгэмж олгох асуудлыг холбогдох хууль тогтоомж, хамтын гэрээ, хамтын хэлэлцээр, хөдөлмөрийн гэрээ, хөдөлмөрийн дотоод хэм хэмжээгээр зохицуулна. Хүүхэд асрах чөлөө нь дууссан, эсхүл дуусаагүй боловч ажилтан хүсэлт гаргасан бол ажил олгогч түүнийг ажлын байранд нь үргэлжлүүлэн ажиллуулах үүрэгтэй бөгөөд хэрэв орон тоо нь хасагдсан, ажилтны тоог цөөрүүлсэн бол адил чанарын өөр ажлын байранд ажиллуулна. Энэхүү заалт нь хүүхэд үрчлэн авсан ажилтанд нэгэн адил хамаарна.