Туслах малчин зөвшөөрсөн тохиолдолд цалингийн 30-аас илүүгүй хувийг мөнгөн бус хэлбэрээр олгож болно

Туслах малчин авч ажиллуулах явдал сүүлийн жилүүдэд хөдөө орон нутагт илүү нэмэгдэж байна. Харин туслах малчдын эрх ашгийг хамгаалах, ямар нэг асуудал гаргахад тэдгээрт хариуцлага тооцох, зохицуулах эрх зүйн зохицуулалт хомс байсаар өнөөдрийг хүрсэн. Тэгвэл энэ асуудлыг ирэх оны 1 дүгээр сарын 1-нээс хэрэгжиж эхлэх хөдөлмөрийн тухай хуульд тусгаж өгөөд байна. Хөдөлмөрийн тухай хуулийн 71 дүгээр зүйлд  туслах малчин, гэрийн үйлчилгээний ажилтан, тэдгээртэй адилтгах ажилтантай хөдөлмөрийн гэрээг бичгээр байгуулна, гэрээндээ ажил, амралтын цагаа харилцан тохиролцож болно, Хөдөлмөрийн гэрээний загварыг ажилтны болон ажил олгогчийн эрх, хууль ёсны ашиг сонирхлыг төлөөлөн хамгаалах байгууллагын саналыг харгалзан Хөдөлмөр, нийгмийн хамгааллын сайд батална... зэрэг асуудлыг тусгажээ. Мөн “Ажил олгогч нь туслах малчин, гэрийн үйлчилгээний ажилтныг долоо хоногт тасралтгүй 24 цагаас дээш хугацаагаар амраах, энэ хуульд заасны дагуу ээлжийн амралт олгох үүрэгтэй” гэж заажээ. Цалин хөлстэй холбоотой зохицуулалтын тухайд,  Туслах малчин зөвшөөрсөн бол цалин хөлсний 30-аас илүүгүй хувийг мөнгөн бус хэлбэрээр олгож болно гэжээ. Өөрөөр хэлбэл, Туслах малчин цалингийнхаа 70 хувийг мөнгөн хэлбэрээр 30 хувийг мал болон эд хөрөнгөөр авах боломжтой. Тэгэхдээ зах зээлийн дундаж үнээр тооцож олгох ёстой. Анхаарах зүйл нь тамхи, согтууруулах ундаа, бүх төрлийн эм, хуулиар хориглосон эд зүйл, бараа бүтээгдэхүүн, тусгай зөвшөөрөлтэй худалдах бараа, бүтээгдэхүүн олгохыг хориглосон. Эдгээр бараа бүтээгдэхүүнээс өгвөл хууль зөрчсөн болно гэсэн үг.  Туслах малчны эрх ашгийг хамгаалах асуудлыг анх удаа хуульд тусгаад байгаа нь энэ юм.