БНСУ-ын аяллын визийн мэдүүлэг ирэх сарын 1-нээс авч эхэлнэ

Цар тахлаас шалтгаалж БНСУ-ын Засгийн газар гадаадаас богино хугацааны аяллын визийг түр хугацаагаар хязгаарласан. Тодруулбал, хүмүүсийн урсгалыг хязгаарлах зорилгоор 2020 оны 4 дүгээр сарын 13-наас С-3 ангиллын виз олголтыг зогсоогоод байсан юм. Уг хоригийг ирэх зургаадугаар сарын 1-нээс албан ёсоор цуцалж байгаа талаар Монгол дахь БНСУ-ын ЭСЯ-наас мэдээллээ. Ингэснээр хэвийн горимд шилжиж, визийн мэдүүлэг авч эхлэх юм байна. Богино хугацааны тус виз нь аялах, дамжин өнгөрөх, хамаатныдаа зочлох болон үүнтэй төстэй шалтгаанаар тус улсад 30 хүртэлх хоногийн турш байх эрхийг хүмүүс болон групп жуулчдад олгодог онцлогтой. Мөн 2020 оноос эхлэн түр хугацаагаар хүчингүй болгосон богино хугацааны олон удаагийн виз сэргээгдэж, хүчин төгөлдөр болох юм байна. Харин олон удаагийн визийн ашиглах хугацаа дуусаагүй байгаа тохиолдолд шууд ашиглах боломжтой. Түр хугацааны хориг цуцлагдсанаар виз мэдүүлгийн бичиг баримтаас тусгаарлалтад орох зөвшөөрлийн хуудас хасагдах юм. Мөн сурах, эмчилгээний зорилгоор зорчих тохиолдолд тус улсын Хууль зүйн яамнаас цахимаар олгогддог журмаар, уригч байгууллага нь визийн портал ( www.visa.go.kr ) цахим хуудсаар дамжуулан хүсэлт гаргах эрхтэй болжээ. Гэхдээ энэхүү шийдвэр тухайн улсад Covid-19-ийн тохиолдол хэр их батлагдаж байгаагаас хамаарч өөрчлөгдөж магадгүй байгааг эх сурвалж мэдээллэж байна.