МОНГОЛ-ХЯТАДЫН ДӨРӨВ ДЭХ УДААГИЙН ЭКСПОД МОНГОЛ УЛСААС 500 ГАРУЙ АЖ АХУЙН НЭГЖ ОРОЛЦОЖ БАЙНА

“Хөгжлийн шинэ боломжийг хамтдаа хуваалцъя” уриан дор Монгол-Хятадын дөрөв дэх удаагийн экспо БНХАУ-ын ӨМӨЗО-ны Хөх хотноо зохион байгуулагдаж байна. Уг арга хэмжээнд Төв Азийн 5 улс, БНХАУ-ын зарим мужийн нийт 3000 аж ахуйн нэгж оролцож байгаа бөгөөд Монгол улсаас 500 гаруй аж ахуйн нэгж оролцож байна. Экспод бараа бүтээгдэхүүн, машин тоног төхөөрөмж, боловсролын үзэсгэлэн, эрүүл мэндийн чиглэлээр уламжлалт эм эмнэлгийн үзэсгэлэнгүүд гарч байна. Уг арга хэмжээ уламжлал болон дөрөв дэх удаагаа зохион байгуулагдаж байгаа бөгөөд хоёр улсын эдийн засгийн хамтын ажиллагааг улам бүр өргөжүүлэхэд чухал түлхэц болж байгааг талууд онцолж байна. Өмнөх гурван удаагийн экспо арга хэмжээ өндөр үр дүнтэй зохион байгуулагдаж нийт 444 хамтын ажиллагааны гэрээ, санамж бичиг байгуулагдаж, нийт хөрөнгө оруулалтын хэмжээ 271 тэрбум 700 сая гаруй юаньд хүрсэн байдаг. Мөн үзэсгэлэнгийн борлуулалтын орлого болон хэлэлцээрийн үнийн дүн 1 тэрбум 900 сая юаньд хүрч дотоодын болон гадаадын хүндэт зочид, үзэсгэлэнд оролцогчдын тоо хоёр саяд хүрсэн байна. Экспо арга хэмжээг Монгол Улсын Хүнс, хөдөө аж ахуй, хөнгөн үйлдвэрийн яам, Эдийн засгийн хөгжлийн яам, холбогдох агентлаг болон БНХАУ-ын талаас тус улсын Худалдааны яам, ӨМӨЗО-ны Ардын Засгийн газар хамтран зохион байгуулж байна.