Хоёрдугаар сарын 12-14-нд “Өргөө” амаржих газарт төлөвлөгөөт хагалгаагаар төрөх заалттай байсан эмэгтэйг өөрөөр нь төрүүлснээс болж нярай эндсэн харамсалтай хэрэг гарсан. Үүний дараа Нийслэлийн эрүүл мэндийн газрын дарга Б.Бямбадорж тушаал гаргаж, тус амаржих газрын дарга Г.Баясгаланг ажлаас нь чөлөөлжээ.
НЭМГ-ын дарга Б.Бямбадорж “Өргөө амаржих газарт удаа дараа эх хүүхдийн амь нас, эрүүл мэндтэй холбоотой ноцтой алдаа гарч байна. Тиймээс эдгээр алдаа дутагдлыг цаашид гаргуулахгүйн тулд удирдлагын шинэ менежмент хийхээр болсон. Нэг ёсондоо “Өргөө” амаржих газрын захирал Г.Баясгаланг ажлаас нь чөлөөлж байна. Эхний ээлжинд амаржих газрын даргад хариуцлага тооцоод, дараагийн удирдлага томилогдох хүртэл Нийслэлийн Эрүүл мэндийн газраас менежментийн баг ажиллана” гэлээ.
Цаашид Нийслэлийн Эрүүл мэндийн газар иргэдийн эрүүл мэнд, эрх ашгийг нэн тэргүүнд тавьж ажиллана. Мөн эмнэлгийн ажилтнуудын харилцаа, хандлагыг засаж сайжруулах чиглэлд анхаарч, бусад улс орны шилдэг туршлагыг энэ салбарт нутагшуулахаар зорьж ажиллана гэдгээ Нийслэлийн эрүүл мэндийн газрын дарга онцоллоо.
Дээрх мэдээлэл нийтлэгдэхэд иргэд өөрсдийн сэтгэгдлийг мэдээллийн дор үлдээсэн бөгөөд Өргөө амаржих газартай холбоотой гомдлын талаар бичжээ. Төрөх эмнэлгийн нийтлэг төрх нь өнөөдрийн дүр зураг болж байгааг эндээс харж болохоор байна. Төрөх гэж буй хүнээс мөнгө авдаг, гар хардаг, хэрэв мөнгө төлөөгүй бол сайхан төрнө гэсэн ойлголт байдаггүй тухай эмэгтэйчүүд сэтгэгдлээ илэрхийлжээ.
