"Сэмжид Хужирт" сувилалд 3 дугаар сарын 1-нээс 25-ны хооронд 13 аймгийн 174 иргэн амарсан байна. Эдгээр иргэдийн 62-оос нь коронавирусийн халдвар илрээд байгаа тухай Эрүүл мэндийн яамны мэдээллээ. Халдвар илэрсэн хүмүүсийн ойрын хавьтлуудыг тусгаарлалтад авсан бөгөөд орон нутгууд хяналтаа тавьж ажиллаж байна.
Орон нутагт бүртгэгдсэн халдварын тоо сүүлийн өдрүүдэд нэмэгдэх хандлагатай байгаа бөгөөд өнөөдрийн байдлаар нийт 610 тохиолдол орон нутагт бүртгэгдээд байна. Сүүлийн 24 цагт орон нутагт шинээр 59 тохиолдол бүртгэгдсэнээс Дархан-Уул 10, Баянхонгор 7, Архангай 19, Өвөрхангай 8, Орхон 10, Говьсүмбэр 2 тохиолдол бүртгэгдээд байна. Дархан-Уул, Архангай аймгуудад халдварын тоо маш өндөр байна. Аймгуудад халдварын тоо нэмэгдэж байгаа ч хариу арга хэмжээг маш сайн авч байгаа бөгөөд тусгаарлах байрны нөөцийг бэлдэж, батлагдсан тохиолдлын ойрын хавьтлуудыг авч байгаа юм. Эмнэлгийнхээ нэмэлт орны нөөцийг тооцоолж, шаардлагатай тохиолдолд дэлгэхээр бэлдэж байгаа тухай ЭМЯ-наас мэдээллээ.