Газрын тосны бүтээгдэхүүний хангамж, үнийг тогтворжуулах ажлыг зохион байгуулах, хяналт тавих үүрэг бүхий төр, хувийн хэвшил, иргэний нийгмийн хамтарсан зөвлөлийн хуралдаан өнөөдөр боллоо. УУХҮ-ийн дэд сайд О.Батнайрамдал "АИ-92" шатахууны үнийн асуудлаар мэдээлэл хийлээ.
Тэрбээр, Уул уурхай, хүнд үйлдвэрийн яам, АМГТГ, шатахуун худалдаа эрхлэгч аж ахуйн нэгжүүдэд өргөн хэрэглээний АИ-92 автобензины хангамж, нөөцийг Засгийн газрын холбогдох тогтоолд заасан хэмжээгээр бүрдүүлж, тус бүтээгдэхүүний жижиглэнгийн үнийг огцом хэлбэлзэлгүйгээр зах зээлийн горимд аажмаар шилжүүлэх горимыг баримтлан ажиллах зөвлөмж гарсан. АИ-92 шатахууны хувьд зах зээлийн горим руу шилжих ёстой. Үүний хүрээнд Олон улсын валютын сангаас зөвлөдөг, олон оронд сайн жишиг болж гарсан 6 сарын дундаж, өртгөөр үнийг тооцоолох автомат үнийн тооцооллын арга руу шилжихээр боллоо. Тодруулбал, Огцом үнэ нэмэгдэхгүй. Сүүлийн зургаан сарын импортын үнийн дунджийг төр, хувийн хэвшлийн оролцоогүйгээр автоматаар тооцоолон гаргана гэсэн үг. Үүнд төр оролцохгүй. Зах зээлээс шалтгаалаад өсч буурч болно. Жишээлбэл, 2050 төгрөгөөс тооцох юм бол нэг удаагийн үнийн хэлбэлзэл 100 төгрөгөөс хэтрэхгүй байхаар зохицуулалтыг оруулж ирж байгаа юм. Уг зөвлөмжийг хэрэгжүүлэх боломжтой хэмээн шатахуун импортлогчид дэмжсэн. Тэгэхээр зах зээлийн горимоор шатахуун импортлогчид 100 төгрөгөөс хэтрэхгүй үнээр АИ-92 шатахууны үнээ нэмнэ нь гэсэн үг. Тиймээс ойрын үед шатахуун импортлогчид үнээ 100 төгрөгөөр нэмнэ нь гэсэн үг" гэлээ.
