Бид коронавирусийн халдвараас урьдчилан сэргийлэх вакцин тариулаад нэг жилийг үдэж байна. Монгол улсад вакцинжуулалт эхэлснээс хойш өнөөдрийн байдлаар вакцины 1-р тунд 2.272.643 буюу нийт хүн амын 69.9 хувь, 2-р тунд 2.174.965 буюу хүн амын 66.9 хувь, 3-р нэмэлт тунд 1.034.423 буюу хүн амын 31.8 хувь, 4-р нэмэлт тунд 117.133 хүн буюу хүн амын 3.6 хувь нь хамрагдаад байна.
Ковид-19 халдварын батлагдсан нийт тохиолдол 469.191, нийт нас баралт 2177 бүртгэгдсэн байна. Харин өнөөдөр улсын хэмжээнд нийт 40 тохиолдол бүртгэгджээ.
Уг халдварт өвчнөөс сэргийлэх хамгийн чухал зүйл нь вакцинжуулалт гэдгийг албаны хүмүүс, эмч мэргэжилтнүүд хэлж буй. Манай улсад вакцинжуулалтын хувь өндөр байгаа нь өнгөрсөн хоёрдугаар сард дэгдсэн Омикрон хувилбарын давлагааг хохирол багатай давахад чухал нөлөө үзүүлсэн гэдгийг мөн ЭМЯ, ХӨСҮТ-ээс мэдээлж байсан.
Улсын хэмжээнд дархлаа сэргээх нэмэлт 3 болон 4-р тунгийн вакцинжуулалт үргэлжилж байгаа бөгөөд өнөөдөр /2022.04.12/ Улаанбаатар хотод суурин 46 цэгт 46 багийн 185 эмч, ажилтан ажиллаж байна. Иргэд өөрт ойр вакцины аль ч цэгт очиж дархлаажуулалтад хамрагдах боломжтой. Дархлаажуулалтын цэгүүд 09:00-16:00 цаг хүртэл ажиллаж байна.