Торгууль, татвар төлөөгүй жолоочийг замын хөдөлгөөнд оролцуулахгүй байхаар хуульд тусгав

Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийг УИХ хэлэлцэхээр болоод буй. Ингэхдээ УИХ-ын зарим гишүүн торгуулиа төлөөгүй жолооч нарыг замын хөдөлгөөнд оролцуулахгүй байх зэрэг зохицуулалт хийх санал гаргаж байсан. Нийслэлийн Засаг дарга бөгөөд Улаанбаатар хотын захирагчийн зүгээс "Замын хөдөлгөөний зөрчлийн торгуулиа төлөөгүй иргэдийн төрийн үйлчилгээ авах зарим эрхийг хязгаарлах талаар ярилцаж байна. Торгуулийн нийт төлөлт дөнгөж 26.5 хувьтай байгаа"-г хэлж байв. Тиймээс тээврийн хэрэгслийн торгууль, татвар, төлбөрийг хугацаанд нь төлөөгүй жолоочийг замын хөдөлгөөнд оролцуулахгүй байхаар Замын хөдөлгөөний аюулгүй байдлын тухай хуулийн төсөлд тусгажээ. Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төслийг дагалдан тээврийн хэрэгслийн албан татвар болон агаарын бохирдлын төлбөрийн тухай хуульд өөрчлөлт оруулахаар өргөн барьсан байна. Хууль батлагдсанаар ирэх оны 01 дүгээр сарын 01-ээс тээврийн хэрэгслийн татвар нэмэгдэх юм. Хуулийн төслийн дэлгэрэнгүйг дараах лин дээр https://d.parliament.mn/tusul/b2da2f4d-7584-4139-854a-df23d7a66ae3 дарж үзэх боломжтой бөгөөд саналаа өгч болох аж.