"Дахиад өгөх амь алга, одоо зогс" хэлэлцүүлэг боллоо

"Дахиад өгөх амь алга, одоо зогс" хэлэлцүүлгийг Зариг.мн сайтаас 2023 оны 11 дүгээр сарын 21-ний өдөр зохион байгуулсан юм. Уг хэлэлцүүлэг цэргийн алба хааж байхдаа амь нас, эрүүл мэндээрээ хохирсон хүмүүсийг албаныхантай уулзуулж, асуудлаа ярих  боломж олгосон юм. Хайртай хүүгээ, ах дүүгээ, ханиа эр цэрэгт явуулчихаад эрэмдэг зэрэмдэг хүлээж авдаг, эсвэл энэ хорвоод байхгүй болсон уйтай мэдээг сонсдог эмгэнэлт явдал эртнээс эхтэй, өнөөдөр ч энэ байдал байсаар байгаа юм. Жилд хэд хэдээрээ цэрэг үхдэг гашуун мэдээ сонсоод халаглаад өнгөрөхөөс илүү байж чаддаггүй энэ байдлыг өөрчилж, цэргийн алба байгууллагад буй алдааг засч сайжруулах нь айл бүрт хамаатай асуудал юм. Хэлэлцүүлэгт амь насаа алдсан цэргүүдийн аав ээж, ах эгч дүү нар, цэргийн алба хааж байхдаа зодуур дэглэлтийн улмаас хохирогч болж насаараа тахир дутуу, ажил хөдөлмөр хийх чадвараа алдсан, унаж татдаг өвчтэй болсон залуус, тэдний ар гэрийнхэн нийлээд 30 гаруй хүн оролцсон юм. Нөгөө талаас Батлан хамгаалах яам, Зэвсэгт хүчний Жанжин штаб, Хил хамгаалах Ерөнхий газар, Хүний Эрхийн Үндэсний Комисс болон улс төрийн намуудын төлөөлөл 20 гаруй албаны хүмүүс оролцож асуудлаа хэлэлцлээ.