Томуугийн идэвхжил 12 дугаар сарын сүүл хүртэл өндөр хувьтай үргэлжилнэ

Томуу, томуу төст өвчний нөхцөл байдлын талаар ХӨСҮТ-өөс мэдээлэл өгөв. Халдварт өвчин судлалын үндэсний төв /ХӨСҮТ/-ийн захирал Ж.Байгалмаа: Томуу, томуу төст өвчний тархалт улсын хэмжээнд  үндсэн таван түвшнээс хоёр дахь буюу идэвхжлийн түвшинд байгаа.  Улсын хэмжээнд амбулаториор үйлчлүүлэгчдийн 5.6 хувь нь томуу, томуу төст өвчтэй. Эмнэлэгт хэвтэж байгаа 8610 үйлчлүүлэгчдийн 22 хувь нь амьсгалын замын цочмог хүнд халдварын шалтгаантай хэвтэн үйлчлүүлж байна. Гэхдээ Булган, Дархан-Уул, Сүхбаатар, Хэнтий аймгуудад дараагийн буюу гурав дахь улбар шар түвшинд шилжсэн байдалтай байна. Вирус судлалын тандалтаар амьсгалын замын синтициальвирус, аденовирус, метапневмовирус хамгийн түгээмэл буюу өндөр хувийн тархалттай байна. Мөн Коронавирус болон томуугийн А хүрээний H3N2 вирусийн тархалтууд хүн амын дунд өвчлөл үүсгэсэн хэвээр байгаа.  Хятад, Солонгост эдгээр вирусүүд мөн адил өргөн тархалттай байгаа мэдээлэл байна. Томуугийн улирал Арванхоёрдугаар сарын сүүл, нэгдүгээр сарын дунд орчим хүртэл нэлээд өндөр хувьтай үргэлжлэх учир олон нийтийн газраар явахдаа амны хаалтаа зүүж, гараа тогтмол угаахыг зөвлөж байна.