Торгуулиа хугацаанд нь төлөхгүй бол нийтэд тустай ажил хийлгэх замаар заавал төлүүлнэ

Согтуугаар тээврийн хэрэгсэл жолоодсон тохиолдолд хүлээлгэх хариуцлага чангаруулах тухай, автомашины торгуулиа хугацаандаа төлсөн тохиолдолд торгуулийг 50 хувиар хөнгөлөх болон бусад асуудлаар Хууль Зүй, Дотоод Хэргийн Яамнаас мэдээлэл хийлээ. Зөрчлийн хуульд орсон нэмэлт өөрчлөлтүүд: Торгуулийг хугацаандаа буюу 15 хоногт төлөх юм бол торгуулийн хэмжээг 50 хувиар хөнгөлнө. Хуульд заасан хугацаанаас хэтрүүлсэн тохиолдолд торгуулийн хэмжээг 50 хүртэл хувиар нэмэгдүүлнэ. Уг шийтгэлийг биелүүлээгүй тохиолдолд нийтэд тустай ажил хийлгэх шийтгэлийн шинэ төрөл нэмэгдсэн. Зөрчил үйлдсэн бол торгуулиа заавал төлнө. Төлөхгүй тохиолдолд заавал торгуулийг төлүүлдэг өөрчлөлт орсон. Мөн зөрчил үйлдсэн иргэн, хуулийн этгээд торгох шийтгэлийг хуульд заасан хугацаанд биелүүлээгүй бол төрөөс авах үйлчилгээг хязгаарлана. Тээврийн хэрэгслийн эзэмшлийн шилтгэлт хөдөлгөөн хийх, тээврийн хэрэгслийн жолоодох үнэмлэх авах, сунгах, ангилал солих, нөхөн авах зэрэг эрхийг хязгаарлана" гэлээ. Түүнчлэн ялын бодлогын өөрчлөлтөөр жолоодох эрх хасах ял нэмэгдсэн, торгох ялын доод хэмжээ зургаа дахин, дээд хэмжээ гурав дахин нэмэгдлээ. Зорчих эрхийг хязгаарлах ялын доод хэмжээ таван сараар, дээд хэмжээ хоёр жилээр нэмэгдэж байна. Тухайлбал, Жолооч согтуурсан үедээ машин барьсан эхний удаад жолоодох эрхийг нэг жилийн хугацаагаар хасаж, 400.000 төгрөгөөр торгоно. Эсвэл 7-30 хоног баривчлах шийтгэл оногдуулахаар Зөрчлийн хуульд өөрчлөлт орсон. Тээврийн хэрэгсэл жолоодох эрхээ хасуулсан, согтуурсан үедээ дахин машин барьсан, шалгуулахаас зайлсхийсэн бол эрүүгийн хуулиар хариуцлага хүлээлгэнэ. Энэ тохиолдолд 1-3 жилээр жолоодох эрхийг хасаж, 2.7-14 сая хүртэл төгрөгөөр торгох, эхсүл 240-720 цаг нийтэд тустай ажил хийлгэх, 6 сараас 3 жилийн хугацаагаар зорчих эрхийг хязгаарлах, 6 сараас 3 жилийн хугацаагаар хорих ял оноохоор ялын бодлого чангарсан. Хуулийн эдгээр өөрчлөлт нь 2024 оны нэгдүгээр сарын 1-нээс мөрдөгдөж байна.