Орон байргүй болсон айл өрхүүдийг түрээсийн орон сууцанд байрлуулна

Монгол Улсын Шадар сайд С.Амарсайхан гамшиг ослын нөхцөл байдалтай холбогдуулан эдийн засаг, эрүүл мэндээрээ хохирхон иргэдийн хохирлыг хэрхэн барагдуулах асуудлаар дараах мэдээллийг өглөө. Газ тээвэрлэсэн машин дэлбэрч, түймэр гарсны улмаас тухайн орчмын 60 айлын орон сууц галд өртсөн. Мөн тэр орчимд ажиллаж амьдардаг иргэдийн 29 автомашин шатсан. Эдгээр иргэд орон байрандаа одоогоор орох боломжгүй байгаа. Хууль хяналтын байгууллагын шалгалт дуусаагүй байгаа учраас шалтгаж, тогтоож, хариуцлага тооцож, хохирол барагдуулахад багагүй цаг хугацаа орно. Иймээс цаг хүлээхгүйгээр НЗД-ын орлогч П.Сайнзоригоор ахлуулсан ажлын хэсэг байгуулж, 60 айл өрхийн байр орон сууцыг нэн яаралтай засах, хэвийн горимд оруулах ажлыг эхлүүлэхээр болсон. Энэ хооронд тухайн айл өрхүүдийн нөхцөл байдлыг нь дордуулахгүйгээр шаардлага хангасан орон сууцанд түрээсийн төлбөр хураамжийг нь төлж байрлуулах шийдвэрийг Засгийн газраас гаргалаа. Мөн бусад шаардлагатай арга хэмжээнүүдийг авч хэрэгжүүлнэ" гэлээ.