Нийслэлийн газар олголттой холбоотой нээлттэй сонсгол явуулна

МУ-ын Засгийн газрын өнөөдрийн ээлжит хуралдаанаар Ерөнхий сайд Л.Оюун-Эрдэнэ нийслэлийн газар олголттой холбоотой нээлттэй сонсгол явуулах чиглэлийг Хууль зүй дотоод хэргийн сайд Б.Энхбаярт өглөө. Энэ талаар ХЗДХ-ын сайд Б.Энхбаяр хэлэхдээ, Нэг удаагийн энэ асуудал, осол нь нийслэл Улаанбаатар хотын хувьд давтагдаж болзошгүй эрсдэлтэй. Өнгөрсөн зун үер болсон. Мөн нийтийн тээврийн асуудал ямар байгааг бүгд мэдэж байгаа. Тээврийн хэрэгслийг дугаарын тэгш сондгой хязгаарлалтаар явуулсан. Ирэх долоо хоногт хичээл сургууль орно. Дугаарын хязгаарлалт зогсож, тэг зогсолт руу орно. Ер нь Улаанбаатар шиг хот дотроо аюултай тээврийн ачаа тээвэрлэдэг, тэр байтугай төмөр зам явдаг хот байхгүй. Сая нэг тээврийн хэрэгслээс үүдсэн үр дагаварын асуудал яригдаж байна. Гэтэл хот дотроо аюултай тээврийг төмөр замаар хийдэг. Бас ойр ойрхон зайтай маш олон хороолол, барилга, үйлчилгээний төвүүд шахаж тулж баригдсан. Үүнийг шийдэхтэй холбоотой тойрог замын асуудал яригдаж байна. Тойрог замыг шийдэх гэхээр газрын асуудалд тулдаг. Энэ бүх асуудлыг өнөөдөр хэлэлцсэн. Нийслэл хот маань дарьтай торх болж хувирсан байна. Уг үндсэн нь олон жилийн газрын  авлига дээр очиж байна. Энэ асуудлаас болж өнөөдрийн Улаанбаатар хот хэн ч гарч ирээд шийдвэрлэх боломжгүй түвшинд тулсан. Тиймээс өнгөрсөн 20 жилийн газар олголт, авлига, нийтийн тээврийн асуудлаар дагнаж иргэд олон нийтийн мэдэх эрхийг хангах хүрээнд асуудлыг УИХ, парламентийн түвшинд хянаж шалгаж, нотлох баримтыг шинжлэх судлах сонсгол зохион байгуулах түр хороог байгуулж, ХЗДХ-ын сайд ахалж ажиллах чиглэл өгсөн.  УИХ-ын даргад хандаж түр хороо байгуулах асуудлыг зохион байгуулна" гэлээ.