С.Амарсайхан: Амиа алдсан албан хаагчийн ар гэр, үр хүүхдийг Монголын төр хамгаална

Өчигдөр буюу 2024 оны 4 дүгээр сарын 8-ны өдөр Чингэлтэй дүүргийн 20 дугаар хороонд байрлах "Миний сүлжээ дэлгүүр"-ийн агуулах шатсаны улмаас ажил үүргээ гүйцэтгэж явсан алба хаагч амиа алдсан билээ. Бид уг асуудлаар өөрөөс тодруулга, мэдээлэл авах гэсэн боловч, гадаад ажлын томилолттой байгаа гэх мэдээллийг өгсөн. Тэгвэл Шадар сайд С.Амарсайхан өөрийн цахим хуудсаараа дамжуулан эмгэнэл илэрхийлжээ. Тэрээр эмгэнэлдээ,  "2024.04.08-ны өдөр Чингэлтэй дүүргийн 20 дугаар хороонд байрлах "Миний сүлжээ дэлгүүр"-ийн агуулахын цахилгаан утаснаас гарсан галын улмаас Чингэлтэй дүүргийн Онцгой байдлын Гал түймэр унтраах, аврах 10 дугаар ангийн ахлах ахлагч Д.Жанчив албан үргээ гүйцэтгэж яваад алтан амиа алдсан явдалд Монголын төр, онцгой байдлын албаны нийт бие бүрэлдэхүүн, Монголын ард түмэн бүгд харуусан, гашуудаж байна. Амь насаа алдсан албан хаагчийнхаа ар гэр, үр хүүхдүүдэд гүн эмгэнэл илэрхийлье. Хаврын салхи ид эхэлж буй энэ үед хувийн болон төрийн бүх албан байгууллага, айл өрхүүд галын аюулгүй байдлаа эргэн нягталж, галын аюул эрсдэлээс урьдчилан сэргийлэх үзлэг хяналтыг цаг алдалгүй эхлүүлж, галын аюулгүй байдлын стандартыг дагаж мөрдөх хэрэгтэй байна. Өргөсөн тангарагтаа үнэнчээр зүтгэж, алтан амиа алдсан авран хамгаалагчийнхаа ар гэр, үр хүүхдүүдийг Монголын төр, ОБЕГ хамгаалан түших болно" гэжээ.